Síðustu tímarnir

Þá er þetta ár alveg að verða búið, búið að vera fínasta ár bara. Ég byrjaði í handbolta og í fyrsta bekk, fór til Frakklands í siglingu og um allt land í útilegu og meira að segja til Vestmannaeyja. Reyndar sigldi ég ótrúlega mikið á þessu ári, náttúrulega á bátnum í Frakklandi og með Herjólfi til Vestmannaeyja og til baka, svo fór ég í siglingu um Lagarfljót, í sjóstangveiði á Borgarfirði eystra og í hvalaskoðun frá höfninni í Reykjavík. Ég svaf líka ótrúlega oft í tjaldi og á mörgum stöðum, og á hverjum stað eignaðist ég nýja vinkonu. Í nokkra daga voru líka þær Júlía og Emilía og pabbi þeirra og mamma með okkur í útilegu, það fannst okkur nú eiginlega skemmtilegast. Amma og afi voru líka með okkur í nokkra daga, og Þórður og Erna meira að segja líka, það var nú best þegar allir voru með.

Ég hélt líka áfram að læra á sellóið mitt á þessu ári, ég er nú orðin bara ansi flink og búin að læra fullt af lögum, eins og til dæmis Bjart er yfir Betlehem og Fann ég á fjalli. Ég er líka orðin mjög flink að lesa og reikna, ég veit ýmislegt um heima og geima, er dugleg að spyrja og geymi vandlega svörin sem ég fæ.

Um jólin er ég búin að hafa það mjög gott með mömmu og pabba og bræðrum mínum. Fyrstu dagana í jólafríinu fékk ég að fara í vinnuna með mömmu, það er rosalega spennandi og það var mjög gaman þar, enda var slatti af krökkum þar með mömmum sínum og pöbbum. Svo erum við bara búin að vera í fríi og hafa það gott, ég fékk margar fínar gjafir sem ég var mjög ánægð með og búin að vera dugleg að hlusta á diskana, lesa bækurnar og púsla, ég fékk tösku sem ég tók með mér þegar ég fór að gista hjá frænku minni og náttfötin og inniskórnir komu sér vel í náttfatapartíinu sem ég fékk að halda fyrir allar bekkjarsystur mínar. Það var sko brjálað fjör, tuttugu stykki sex ára stelpur í jólafríi! Sem betur fer var ég búin að skrifa þétta leikjadagskrá, mamma og pabbi gáfu okkur pizzur og snakk að borða og svo vorum við bara á fullu í öllum leikjunum.

Og nú er að koma gamlárskvöld og ég ætla að vaka og sjá alla flugeldana. Við ætlum að vera hjá ömmu og afa ásamt fleira fólki, það verður örugglega fjör!

Auglýsingaleikurinn

Um daginn þegar við vorum að horfa á Útsvar kenndi mamma mér auglýsingaleikinn. Mér fannst hann geggjað skemmtilegur, eiginlega skemmtilegri en Útsvar svo ég beið spennt eftir næstu auglýsingum. En nú er náttúrulega sá árstími þegar meirihlutinn af auglýsingum eru bókaauglýsingar, svo þetta verður stundum pínu einhæft. Nokkrum dögum seinna þegar ég var búin að fá mjög margar bækur í auglýsingaleiknum þá varð mér að orði, ég verð bara að fara að leggjast upp í rúm og lesa! Mér finnst líka svo gaman að lesa, ég er til dæmis farin að stelast til að lesa uppi í rúmi þegar ég á að vera farin að sofa, eins og mamma man líka eftir að hafa gert þegar hún var sex ára :-)

Engar fréttir...

Dagarnir ganga sinn vanagang núna, það er alltaf gott að vera komin í rútínu og hafa nóg að gera. Nú þarf ég náttúrulega að mæta í skólann á ákveðnum tíma og með það fór ég snarlega að vera morgunsvæf. Samt bara virka daga, um helgar finnst mér alveg nóg að sofa til sjö. Í skólanum erum við að vinna alls konar með stafi og tölur í íslensku og stærðfræði, ég er til dæmis orðin ansi lunkin í gálga (hangman). Svo erum við reglulega í tölvum, heimilisfræði, vettvangsverðum, myndlist, leiklist og fleiru. Í frístundaskólanum eru líka afmörkuð námskeið, ég er búin að vera á námskeið í kínversku og leirlist, og er núna á jóganámskeiði. Svo er ég í handbolta tvisvar í viku eftir skóla, sellótímum einu sinni í viku og annan hvern laugardag eru hóptímar í selló. Svo það er nóg að gera hjá mér.

Jú svo er það nú að frétta að við fórum í Víðihlíð um helgina. Það var náttúrulega bara frábært eins og alltaf, ég var alveg til í að sleppa afmæli til að komast sem fyrst í sveitina. Við fundum smá snjó og lékum okkur á alveg frábærlega skemmtilegum snjóþotum sem pabbi fann í Toys'R'Us, þær eru eiginlega eins og lítið brimbretti, léttar og renna alveg ótrúlega vel. Veðrið var samt ekki mjög spennandi og við systkinin urðum öll þrjú ansi blaut og köld en það var samt rosalega gaman hjá okkur.

Nafnapælingar

Ef ég eignast til dæmis fjóra stráka og eina stelpu, þá eiga þeir allir að heita Snæfinnur en stelpan á að heita Snædís. Mamma spurði hvernig ég ætlaði þá að vita við hvern ég væri að tala, þá heitir einn bara Snæfinnur Björn og svoleiðis, skilurðu?

Augljóst

Um daginn kom ég heim með heimaverkefni úr skólanum. Mamma spurði hvenær ég ætti að skila því. Ég hafði nú sjaldan heyrt eins kjánalega spurningu, auðvitað bara þegar ég væri búin með þetta!

Frúin í Hamborg

Mamma: Hvað keyptirðu fyrir peningana sem frúin í Hamborg gaf þér í gær?
Rósa: Ég keypti Ísland
Mamma: Ha? Allt Ísland?
Rósa: Allt Ísland
Mamma: Kostaði það ekki mikið?
Rósa: Ég veit það nú ekki. Ég er ekki búin að borga það.
Mamma Núnú?!?
Rósa: Ég átti ekki nógan pening.
Og þá gat mamma ekki annað en skellt upp úr...

Mamma var annars aðeins að útskýra fyrir mér að það væru ekki til eins miklir peningar á Íslandi lengur og sumir myndu kannski eiga svolítið erfitt af því mömmur þeirra og pabbar myndu missa vinnuna. Jújú, ég skildi það. Hafði samt ekki miklar áhyggjur, jú það er nú gott að eiga húsið sitt, en annars getur maður líka alveg bara byggt kofa og átt heima þar. Það myndi bara vera notalegt!

Afmælisstelpa

Loksins á ég afmæli í dag. Ég er náttúrulega búin að vera að bíða eftir þessu í marga daga og átt frekar erfitt með að sofna undanfarin kvöld. Ég spratt á fætur í morgun og fékk afmælissöng og pakka. Frá mömmu og pabba fékk ég myndavél (leikfanga, en samt stafræn, ótrúlega flott) sem getur meira að segja tekið smá vídeó. Svo mamma fékk að syngja afmælissönginn nokkrum sinnum inn á vídeó klukkan sjö í morgun, það var hressandi. Guðmundur Steinn söng líka fyrir mig, Khokha ammilidag :-) Svo fór ég með inn á leikskólann og hitti þar hana Hjördísi sem var hópstjórinn minn og knúsaði mig í bak og fyrir í tilefni dagsins, það var ósköp yndislegt. Og á eftir fæ ég svo að bjóða vinkonum mínum í Smáralindina í veislu, þá ætla ég sko að taka myndir af þeim öllum.

Leikhúsið

Við skelltum okkur á opið hús í Þjóðleikhúsinu í gær, og það var svo aldeilis ljómandi skemmtilegt. Við sáum atriði úr Lífið er diskó og Skilaboðaskjóðunni, fengum að máta búninga, sáum alblóðuga menn úr Macbeth og líka Einar Áskel brúðuna, fengum kleinur og pylsur og andlitsmálningu. Þetta var bara alveg frábært og mjög vel heppnað fannst okkur, ef svo ólíklega skyldi vilja til að einhver úr Þjóðleikhúsinu sjái þetta þá bara þökkum við kærlega fyrir okkur :-)

Tilgangur þróunarinnar

Engir tveir sebrahestar eru með eins rendur, eins og engar tvær manneskjur eru með eins fingaför. En sebrahestar nota ekki tölvur, þannig að rendurnar þeirra eru bara til skrauts.

(Skýring frá mömmu, vinnufartölvurnar þeirra pabba og mömmu eru báðar með fingrafaralesara til að logga sig inn, augljóslega eru fingaför því til þess að komast inn í tölvur).

Sigling

Í gær varð pabbi minn fertugur. Í tilefni dagsins ákvað mamma að gera eitthvað skemmtilegt, svo hún brunaði með okkur alla fjölskylduna niður á höfn og um borð í hvalaskoðunarskip. Svo sigldum við af stað, og byrjuðum um leið að veltast svoleiðis til og frá að maður þurfti virkilega að halda sér fast. Mér fannst þetta eiginlega bara fjör, en var nú samt aðeins orðin skrítin í maganum á tímabili. Og stóri bróðir minn var barasta mjög sjóveikur greyið. En ég sá fullt af hvölum og var hæstánægð með ferðina. Ég hvíslaði samt að mömmu þegar við vorum komin í land og gengum til baka fram hjá hvalveiðiskipunum, að þetta hefði nú verið meira spennandi ef við hefðum líka verið að veiða hvalina.

Komin heim

Jájá, við erum semsagt komin heim úr fríinu, aldeilis búin að hafa það gott. Við tjölduðum sjö sinnum, enda var ég alveg farin að verða hissa hvað mamma og pabbi voru fljót að koma tjaldinu upp. Við tjölduðum í Laugafelli, Landmannalaugum, Landmannahelli, við Kaffi Langbrók í Fljótshlíð, í Vestmannaeyjum, Lóni og Atlavík. Við fórum líka tvisvar í Víðihlíð til að bíða af okkur rigningu, vorum á Akureyri í nokkra daga, og enduðum í skála í Húsavík eystri (sunnan Borgargjarðar eystri) í nokkra daga með ömmu sem var skálavörður þar í eina viku. Þar fannst mömmu eiginlega best að vera. Fyrir utan alla geitungana, einn stakk mig m.a.s. í fótinn en það var af því að ég var með sykurpúðaklístur á fætinum og af því að ég steig næstum ofan á búið. En þá líka fundum við búið og pabbi gat drepið það. Við keyrðum síðan alla leiðina heim úr Húsavík á 12 tímum, með viðkomu í Sænautaseli og á Skútustöðum. Það var nú ansi langt, en það voru allir orðnir svo spenntir að komast heim að við vorum bara mjög dugleg í bilnum. Núna bíð ég svo bara eftir að fá að fara í skólann og hitta allar vinkonurnar, ekki síst til að sýna þeim að ég er búin að missa tönn :-D

Loksins

Meira sumar

"Rauða" sumarið varði ekki lengi, það er aftur komið gott veður og er víst ennþá betra á Akureyri, en þangað erum við einmitt að fara :-) Pabbi og Sigurður eru búnir að vera þar síðan á þriðjudagskvöldið (Sigurður átti að vera að keppa á fótboltamóti en úlnliðsbrotnaði, en langaði samt að fara úr því þeir áttu flugmiða) og á morgun ætlum við mamma svo að keyra með Guðmund Stein og Gabríel. Svo erum við bara komin í sumarfrí og ætlum að gera eitthvað sem okkur dettur í hug, vonandi tjalda í góðu veðri og fara í sund og eitthvað fleira. Eftir viku ætlum við að elta Sunnu og Magga uppi, þau eru að koma til Íslands í smá frí og verða þá í tjaldvagni einhvers staðar. Amma og afi ætla líka að koma í útilegu einhvers staðar, og jafnvel Þórður og Erna líka, svo það verður örugglega mikið fjör....

Sólin farin

Af hverju er svona kalt þegar er sumar? Þetta verður rautt sumar :-(

Útsmogin

Ég er alltaf að æfa mig í að stjórna aðstæðum mér í hag. Um helgina vorum við í útilegu og ég var að reyna að fá pabba til að fara með mig að veiða þó það væri eiginlega afleitt veiðiveður, rok og sól. Hann ætlaði samt að fara aðeins með mig eftir kvöldmatinn, en svo komu gestir í tjaldið og allir voru að spjalla. Þá hvíslaði ég að mömmu svo enginn annar heyrði, "viltu segja svona við pabba, jæja ætlið þið ekki að drífa ykkur".

Og í gær fórum við mamma og Guðmundur Steinn til ömmu að búa til rabarbarasultu (í staðinn fyrir sultuna sem ég bjó til í skólanum og mamma missti í gólfið). Þá stakk ég upp á því við ömmu hvort það væri ekki tilvalið að búa til vöfflur úr því við værum komnar með svona glænýja og fína rabarbarasultu. Svo mætti maður bara ráða hvort maður fengi sér sultu. Mér þykir hún nefnilega ekki góð. En vöfflurnar fékk ég :-)

Pæling

Konur kenna í brjósti um einhvern. En karlar, hvað gera þeir, kenna í geirvörtu um einhvern?

Eyðimörk

Í skólanum í dag fórum við í eyðimörk. Eða eitthvað sem heitir líkt og eyðimörk... Já alveg rétt, Heiðmörk. Við löbbuðum þangað, ég var gett svöng á leiðinni og borðaði tvær pylsur þegar við komum á leiðarenda.

Frakkland

Frakklandsferðin var einfaldlega æði, við mælum algjörlega með svona sumarfríi og getum ekki beðið eftir að komast aftur. Ég held að mömmu hafi næstum langað að skæla þegar við fórum af bátnum, hún vildi bara vera lengur að sigla. Sjáið bara hvað þetta var frábært.

Við flugum fyrst til Parísar og notuðum seinnipart þess dags til að taka skrens á Euro Disney. Það lukkaðist ótrúlega vel þó við hefðum ekki mikinn tíma þar (og borguðum fáránlega mikið fyrir þetta ævintýri).

Svo flugum við til Toulouse og tókum lest þaðan áfram til Castelnaudary þar sem við fórum í bátinn. Og það var sko alveg svona gaman!

Svo var bara siglt í rólegheitunum eftir Canal du Midi, við höfðum það aldeilis ljómandi gott eins og þið sjáið.

Við vorum líka dugleg að fara í land og hjóla, ég var búin að kunna að hjóla í tæpar tvær vikur þegar við fórum í ferðina og stóð mig bara mjög vel, hjólaði aldrei út í skurðinn en ég kom að vísu dálítið hrufluð og marin heim. Og reyndar mamma líka, hún steyptist af hjólinu og næstum út í vatnið þegar ég hjólaði beint fyrir hana fyrsta daginn.

Í Carcassonne var þessi hringekja, það er bara eitthvað við hringekjur sem er alltaf skemmtilegt.

Og þarna erum við að bíða eftir ís á veitingastað inni í gömlu borginni í Carcassonne. Ótrúlega fín og góð systkini :-)

Þetta var geggjað gaman, við vorum á veitingastað að borða kvöldmatinn og á meðan fullorðna fólkið var að klára að borða fórum við systkinin í náttúruskoðun. Við söfnuðum saman heilum dýragarði af sniglum, ótrúlega flottum og spennandi.

Og þarna er ég með ömmu og mömmu í sumarvindinum í Le Somail.

Ótrúlega spennt

Nú eru bara tveir dagar þangað til við förum til Frakklands og ég er alveg að springa úr spenningi. Ég er búin að vera mjög dugleg að æfa mig að hjóla því við verðum með hjól með okkur á bátnum, og svo er ég líka búin að vera dugleg að æfa mig í að fara snemma að sofa og vakna snemma, því við þurfum náttúrulega að vakna klukkan fimm til að fara í flugvélina. Við ætlum að reka nefið aðeins inn í Disneyland í París á föstudaginn, en það verður víst frekar stutt því það er ekkert opið fram á kvöld þar. Á laugardaginn förum við svo í aðra flugvél og svo í lest og svo hittum við ömmu og afa á bátnum. Svo verður bara hafist handa við að sigla í makindum um Canal du Midi.

Vatnaskógur

Vatnaskógur var geggjaður! Við fórum í sveitaferð og sáum lömb fæðast, og ég fékk meira að segja að halda á lambi. Og við fórum í fjöruferð, að sigla á vatninu, í kassabíla, fjör í íþróttahúsinu, náttfatapartý, fengum pylsur og ís, og skemmtum okkur ótrúlega vel saman. Það var ekkert erfitt að fara svona að heiman, enda var ég með vinkonum mínum og kennurunum sem ég þekki svo vel. En það var samt líka voða gott að koma heim. Ég var líka ansi þreytt eftir ferðina, meira að segja nógu þreytt til að viðurkenna það :-)

Hvítasunnan

Um síðustu helgi var hvítasunnuhelgin, og þá var heldur betur nóg um að vera hjá okkur. Á laugardeginum komu amma Gisela og afi Jón í heimsókn, borðuðu hjá okkur og amma æfði sig aðeins í að passa Guðmund Stein því hún ætlar að hugsa um hann hérna heima í Skrúðási á meðan við hin förum að sigla í Frakklandi í byrjun júní. Afi Jón gerði líka heilmiklar æfingar með fótunum, Guðmundi Steini finnst nefnilega svo gaman að sitja hjá honum á sköflungnum og hossast.

Á sunnudaginn fórum við svo í svolítið langt ferðalag, til Ólafsvíkur. Þar var veisla sem ég skemmti mér svoleiðis ótrúlega vel í, ég horfði á vídeó og borðaði kjúklingaleggi, hitti Emil frænda minn og spjallaði dálítið við hann, og ég kynntist stelpum sem voru með mér að leika með lestarteina og lest sem gat meira að segja keyrt á teinunum. Þetta var bara með skemmtilegri veislum sem ég hef farið í!

Og á mánudeginum var síðan afmælisveisla fyrir þá frændur mína Teit Helga og Berg Mána. Það er nú alltaf mikið fjör þegar við frændsystkinin hittumst, og í þetta sinn passaði ég mig að klæða mig þannig að ég gæti leikið úti, í síðasta afmæli var ég nefnilega í fínum kjól og gat ekki leikið úti eins og mig langaði svo mikið til.

Nú, vikan er líka búin að vera viðburðarík, bæði fimleikarnir og tónskólinn eru að klárast, ég er búin að vera á stífum fimleikaæfingum fyrir lokasýninguna í dag, og svo var sellóæfing fyrir skólaslitin þar sem ég átti að spila, en mamma reyndar misskildi póstinn frá skólanum og hélt að skólaslitin væru daginn eftir æfinguna, en ekki beint eftir hana sama dag, svo ég mætti á æfinguna en missti af að spila á sjálfum skólaslitunum.

Á mánudaginn rennur svo upp dagur sem er lengi búið að bíða eftir, þá fer ég með hinum börnunum í fimm ára skólanum í útskriftarferð í Vatnaskóg og við gistum þar í tvær nætur! Ég er búin að pakka niður í útskriftarpokann minn sem ég bjó til í skólanum, í honum eru náttfötin, tannbursti, svefnfélagi og bók.

Stundum fer maður á kostum

Í gær var ég að leika við tvær vinkonur, við vorum í skólaleik og skólinn var í ferðalagi þar sem átti að fara að gista. Ég var kennarinn og þegar var kominn háttatími í leiknum þá sagði ég, "jæja farið nú að sofa krakkar mínir, þið megið reikna uppi í rúmi". Ég var sko ótrúlega góður kennari að leyfa þeim það.

En á föstudaginn, þá var Guðmundur Steinn kominn með eyrnabólgu og það lak ógeð út úr eyranu á honum. Ég var við hliðina á honum í bílnum og var eitthvað að fárast yfir þessu, svo mamma fór að segja mér frá því þegar ég var lítil og fékk eyrnabólgur. Svo spjölluðum við eitthvað um það, svo langaði mig að heyra fleiri sögur og sagði við mömmu, "segðu mér meira frá því ég var lítil, samt ekki um eyrnabólgu, ég fæ taugaáfall ef ég heyri meira um eyrnabólgu!"

Mánuður liðinn

Það verða komin jól aftur áður en maður veit af! Á þessum mánuði síðan ég skrifaði síðast er margt skemmtilegt búið að gerast. Við fórum til Akureyrar að heimsækja ömmu og afa, þar fór ég í skíðaskóla og varð algjör skíðasnillingur. Skólinn var frá tíu til tvö bæði laugardag og sunnudag, og við fengum pizzu í hádeginu. Ég eignaðist margar vinkonur og skemmti mér konunglega. Helst vildi ég ekkert hætta að renna mér þó ég væri orðin alveg dauðþreytt og stæði varla í lappirnar.

Mamma og pabbi fóru til Marokkó og það var víst mjög gaman og mikil upplifun. Þau fóru meira að segja í loftbelg og allt. Við Guðmundur Steinn vorum fyrst hjá ömmu og afa í tvo daga og svo fengum við að fara til Silju og gista þar eina nótt. Ég keppti á fyrsta fimleikamótinu á meðan mamma og pabbi voru í Marokkó, á Ponsumóti þar sem ég stóð mig auðvitað mjög vel þó við ynnum nú ekki. Afi fór með mér og tók fullt af vídeómyndum svo mamma og pabbi gætu séð hvað ég var flink.

Ég er mikið búin að vera úti í góða veðrinu, á trampólíni og í heita pottinum og svo er ég búin að vera mjög dugleg að æfa mig á línuskautum. Það er svo gaman þegar vorið er komið og hægt að vera úti að leika.

Ein þreytt

Af einhverjum ástæðum var ég svo ótrúlega þreytt í skólanum í dag, að ég lagðist bara á dýnu inni í leikstofu og svaf þar í dágóða stund. Það getur nú aldeilis verið heppilegt að hafa leikstofu með góðum dýnum, mamma væri stundum alveg til í að leggja sig svona á daginn.


Um síðustu helgi drifum við okkur loksins í Bláfjöll. Ég fékk leigð skíði og renndi mér eins og herforingi í brekkunum. Ég datt náttúrulega nokkrum sinnum og kunni ekkert að beygja en ég hafði engar áhyggjur af því. Pabbi hjálpaði mér nú dálítið, ég gat hvorki staðið upp sjálf né komist upp að lyftunni, en ég gat hins vegar alveg farið ein í diskalyftunni, og það margar ferðir meira að segja. Ég var ótrúlega montin af sjálfri mér! Sigurður Pétur var líka mjög flinkur á snjóbrettinu og Guðmundur Steinn tók sig vel út á snjóþotunni.





Og páskarnir já, þeir voru bara frábærir eins og alltaf. Við fórum í páskaeggjaleit úti í brekkunni í Víðihlíð á föstudaginn langa. Mamma vill nefnilega endilega draga fram páskaeggin fyrir páskadag svo það sé hægt að narta í þau í páskafríinu. Á páskadag fékk amma síðan þá frábæru hugmynd að gera aðra eggjaleit, í það skiptið harðsoðin egg sem voru falin í stofunni. Síðan máttum við lita á eggin, og loks borða þau. Mér fannst eggjaleitin það skemmtilegasta við páskafríið. En svo var líka margt annað mjög skemmtilegt, eins og að leika úti í snjónum með bræðrum mínum og hundinum, renna sér niður brekkur á snjóþotu eða á maganum, fara í heita pottinn og lesa, ekki má gleyma því. Ég las næstum því alla Sigrún fer á sjúkrahús, alveg sjálf. Og lét les hana nokkrum sinnum fyrir mig. Ég las líka Drekann með rauðu augun og Ólympíustrumpinn. Það er alltaf svo ótrúlega gaman að vera í Víðihlíð, og sérstaklega þegar margir eru.

Vangaveltur

Bíltúrinn í og úr sellótímum er nokkuð langur og margt hægt að grufla og skrafa á leiðinni. Í dag var mér sérstaklega hugleikið yfirvofandi páskafrí og ég var mikið að velta fyrir mér nákvæmlega hvenær ég yrði sótt í skólann á morgun, hvenær við myndum leggja af stað í Víðihlíð og hvenær ég ætti að pakka niður dótinu mínu (eða pakka inn). Helst vildi ég nú fá frí í dag til að pakka, en það var ekki í boði. Jæja, nema hvað að svo byrjar lag í útvarpinu og ég verð svona líka spennt og glöð með það og segi, "þetta er svona um frí". Mamma var pínu hissa því hún mundi ekki eftir neinu um frí í textanum. En svo kom viðlagið - já það er lotterí og ég tek fátt í frí!

Svo á leiðinni í skólann (eftir að við vorum búnar að komast að því að tónskólinn er farinn í páskafrí) var ég komin í aðrar hugleiðingar og sagði allt í einu upp úr þurru við mömmu, "Ég veit hvernig maður getur búið til kind. Maður tekur bara svona ull og svo tekur maður einhvern haus og eyru og setur á, og svo fullt af fótum. Og þá er komin kind!" Ekki mikið mál sko. Mamma spurði hvort þær fæddust ekki sem lítil lömb, jújú ég vissi það alveg, en það er sko líka hægt að búa til kind svona, maður þarf bara að finna einhvern haus og eyru og fætur.

Búningadagur

Það var svo gaman á öskudaginn hjá okkur í skólanum að frábæru kennararnir okkar ákváðu að hafa annan búningadag, sem er í dag. Það voru smá vangaveltur yfir þessu í gær, fyrst stakk ég upp á því að kaupa búning en mömmu fannst nú ekki alveg ástæða til þess þar sem ég heilan helling af búningum sem ég hef fengið fyrir öskudaga, í jólagjöf og frá stóra bróður. Við rifjuðum aðeins upp hvaða búninga ég ætti, en svo allt í einu vissi ég nákvæmlega hvað ég vildi vera, draugur! Svo við fundum sængurver í gær og klipptum það til þangað til ég var orðin ótrúlega flottur draugur. Og fyrst vissi engin hver ég var þegar ég mætti í skólann í morgun :-D

Mikið að gera

Já það er sko nóg að gera hjá manni þó maður sé bara fimm ára. Ég er í skólanum flesta daga til fimm. Þegar ég kem heim vil ég helst fara út að leika við vinkonu, sérstaklega þegar veðrið er gott og alveg að koma sumar eins og mér finnst stundum vera. Tvisvar í viku eru fimleikaæfingar (á milli sex og sjö, mikið hlökkum við öll til þegar bærinn og íþróttafélagið verða búin að semja um að hafa æfingarnar á þeim tíma sem tómstundastarfið í skólunum er) og svo les ég núna eina lestrarbók á hverjum degi og spila daglega æfingamatseðilinn minn á sellóið. Mér finnst svo spennandi að fara eftir honum og lesa hann sjálf. Á honum er núna: Risakóngur Ragnar, eitt tilbrigði við samloku, Gulur rauður 2x, Parísarhjólið 3x, Söngur vindsins 2x, Halti grái hérinn, og svo er ég að læra fyrstu línuna í Signir sól.

Það er margt og mikið búið að gerast hjá mér síðan ég skrifaði síðast, enda var það fyrir mjög löngu síðan. Ég man nú ekki eftir því öllu, né hverju ég var búin að segja ykkur frá. En ég var alla vega ekki búin að segja ykkur frá því að ég fór um síðustu helgi í nafngiftarveislu hjá lítilli dömu sem fékk það fallega nafn Guðlaug Nóa. Við mamma fórum saman í veisluna, en Guðmundur Steinn varð að vera heima með pabba því hann var búinn að vera svo lasinn. Ég skildi það nú aldeilis fljótt, "Guðmundur Steinn má ekki koma í veisluna", sagði ég. "Hann gæti smitað alla og þá myndi hann eyðileggja veisluna. Þá yrði hann skammaður, er það ekki mamma!". Þá skellti mamma nú upp úr þegar hún sá fyrir sér Guðmund Stein fá orð í eyra, og alla veislugestina liggjandi í bráðsmitandi instant veikindum. Nei þá var nú betra að geyma hann bara heima.

Mest spennandi framundan er auðvitað páskafríið, ég er löngu byrjuð að telja niður dagana og hlakka mikið til að fara í Víðihlíð. Ég vona að það verði snjór svo við getum leikið okkur úti í snjónum, eða að það verði ekki snjór svo við getum rúllað okkur niður brekkuna. Svo eftir það er það ferðin til Frakklands sem við ætlum að fara með ömmu og afa í júní. Við ætlum að fara að sigla á bát, ég er mjög spennt að sjá alla krókódílana og hákarlana og sjávardýrin. Mamma og pabbi eru með einhverjar efasemdir um að það sé svo mikið líf í skipaskurðunum, en ég hlusta sko ekkert á það.

Fárveik

Nú er ég eins veik og ég hef nokkurn tímann orðið. Í gær var ég með mikla hálsbólgu og rúmlega 38 stiga hita, og í dag er ég búin að vera með 39-40 stiga hita og liggja í sófanum í allan dag. Mér fannst ósköp leiðinlegt í gær að vera lasin og vildi endilega fá að heimsækja vinkonu undir kvöldið þegar mér fór að líða aðeins betur, en í dag er ég bara búin að vera of lasin til að láta mér leiðast.

En það eru nú ekki tóm leiðindi samt, því á sunnudaginn átti stóri bróðir minn hvorki meira né minna en ellefu ára afmæli. Það var rosalega flott veisla fyrir bekkjarbræður hans með rjúkandi þurrís, gerviflugum, beinagrindum og Harry Potter bíói. Ég var mjög spennt fyrir því að vera með stóru strákunum, en svo á endanum var nú miklu skemmtilegra að leika bara við hana Hugrúnu bróðursystur mína. Ég hélt fyrst að hún væri ennþá svo mikið smábarn og vildi ekkert að hún væri að leika með Pet Shop dótið mitt og svoleiðis. En hún er ekkert smábarn lengur, orðin þriggja og hálfs árs og við getum sko vel leikið okkur saman.

Stórt skref

Nú er ég orðin svo stór að ég fékk að gista hjá vinkonu minni, henni Kristínu Kolku. Það var ótrúlega gaman hjá okkur og við vorum mjög duglegar. Mamma hennar sótti okkur báðar í skólann og við fórum heim til Kristínar. Við vorum svo spenntar að vera að fara að gista saman að við fórum beint í náttfötin. Svo lékum við okkur í fimleikaæfingum og alls kyns skemmtilegum leikjum, borðuðum fullt af fiski í kvöldmat og fórum svo prúðar og góðar að sofa á dýnu undir sömu sæng. Við vildum nefnilega alls ekki fá aukasæng, við vildum bara kúra okkur saman. Daginn eftir fór svo mamma hennar með okkur í skólann og mamma og pabbi hittu mig ekki fyrr en eftir þann skóladag. Þeim fannst þetta nú dálítið skrýtið en mér fannst þetta ekkert mál.