Ja hérna, ég held ég hafi nú bara stækkað um marga mánuði í dag. Ég er á fullu að læra að nota varirnar og tunguna við að búa til hljóð og er búin að vera rosalega dugleg að "tala". Svo kann ég núna á pelann minn, jibbí, þá þarf ég ekki að vera banhungruð á meðan pabbi og mamma fara á árshátíðina á morgun. Og svo fékk ég að smakka mjólkurkex, namminamminamm! Þó ég sé ekki með neinar tennur þá tókst mér alveg að borða smá bita og þetta er sko það besta sem ég hef fengið. Svaf vel í nótt, sofnaði klukkan tíu en vaknaði reyndar við einhver læti í mömmu stuttu seinna. Tókst eftir smá stund að sofna aftur og svaf til klukkan sjö í morgun. Ég held samt að ég hafi vaknað aðeins of snemma því ég skældi smá þegar ég vaknaði, en ef ég vakna klukkan átta er ég bara kát og glöð.

Jæja, kommentin komin í lag. Ekki samt það að neinn segi nokkurn tíma neitt, enda hefur mamma eiginlega engum sagt frá þessu. Híhí, skiptir engu máli :-)

Við mamma fórum í langan leiðangur upp í Breiðholt í gær, að heimsækja Fríðu Valdísi og Eddu Sólveigu, og það komu líka mörg önnur börn. Við fórum alveg í þrjá strætisvagna og ég svaf alla leiðina. Venjulega vakna ég nú á leiðinni, þegar við förum út úr fyrsta strætónum eða um það bil, en ég var svo ósköp þreytt í gær af því ég öskraði í næstum alla fyrrinótt. Það var ekki gaman. Þannig að í gærkvöldi fór ég að sofa klukkan tíu og svaf bara í einum dúr til næstum átta í morgun. Það var miklu betra og ég held að pabba og mömmu hafi fundist það líka. Sunna frænka kom að passa mig og stóra bróður í gærkvöldi, mamma og pabbi voru í síðasta jógatímanum sínum, alla vega á þessu námskeiði. Svo ætla þau bara að fara í venjulega tíma til skiptis. Ég var svolítið góð við hana, en samt frekar þreytt og pirruð svo hún gat a.m.k. ekki spilað við stóra bróður eins og hún gerði síðast. Mamma gaf mér aftur kartöflu í gær, en þá bara gubbaði ég, þetta er voðalega skrýtinn matur finnst mér.

Æi, hvað kom fyrir kommentakerfið mitt?

Hah, mamma vissi sko ekki að hún ætti svona góða stelpu! Klukkan tíu lagðist ég í rúmið mitt og núna korteri seinna er ég steinsofnuð. Og það án þess að heyrist eitt einasta hljóð. Ég var bara ekkert þreytt í gær, mamma setti mig allt of snemma í rúmið held ég, svo mér var bara farið að leiðast áður en ég náði að sofna. En svo á eftir að koma í ljós hvernig mér gengur að sofa í nótt. Amma Inga Rósa kom aðeins áðan að leika við mig. Það fannst okkur mömmu gaman. Pabbi er nefnilega á fundi svo við vorum aleinar heima.

Humm, þetta var nú skrýtið. Mamma var að láta mig borða eitthvað nýtt sem hún segir að heiti kartafla, ég held mér hafi nú ekki fundist þetta vont en skrýtið var það. Svo var ég í sundi, rosalega dugleg, ég kafaði alveg oft og mörgum sinnum. Svo var ég orðin dálítið þreytt og svöng, svo þegar kennarinn var að láta mig standa þá var ég svo reið að ég spyrnti fast á móti og stóð þar með alveg rosalega flott, mamma og pabbi sögðu að ég væri ótrúlega dugleg. Gaman gaman.

Ömurlegt, ömurlegt, ömurlegt! Ömurleg mömmukona, ömurlegur pabbamaður, allt ömurlegt. Ömur, humm, skrýtið orð, hvaðan skyldi það koma? Jæja, en það er nú alveg allt gott núna, en það var sko ekkert gaman í nótt. Ég skil ekkert í þessu fólki, það er nú ekki mikið mál fyrir þau að lyfta mér upp í sitt rúm og leyfa mér að liggja þannig að ég geti fengið mér súp hjá mömmu af og til. Þau vilja bara sofa alla nóttina, hrjót hrjót, og ætlast til þess að ég geri það líka. Svo ég öskraði á þau í klukkutíma milli tvö og þrjú, og svo svaf ég til átta. Það var reyndar ósköp gott að sofa svona vel og lengi, venjulega rumska ég alltaf af og til og fæ mér smá sopa. Æ kannski er best að hætta því og sofa bara alla nóttina eins og pabbi og mamma. Jæja, ég sé til hvað ég geri í nótt. Alla vega ætla ég í sund á eftir, vonandi verður það gaman. Verst að Sara Mist er lasin greyið, svo hún getur ekki farið í sund.

Úpsí, ég held að mamma ætli að setja mig aftur í bumbuna og geyma mig þar :-( Ég er bara ekkert þreytt (finnst mér alla vega...), vildi alls ekki fara að sofa í gærkvöldi og öskraði bara eins og stunginn grís. Fyrst var ég ekkert svöng, svo setti mamma mig í rúmið og ég lék mér að tánum mínum í smá stund, svo var ég orðin svöng og öskraði þangað til mamma gaf mér að drekka, þá drakk ég þangað til ég var orðin södd, lagðist aftur í rúmið, fattaði að ég var ennþá svöng, öskraði, drakk, öskraði, drakk, o.s.frv. þangað til pabbi kom og svæfði mig. Hehe í stóra rúminu og lá við hliðina á mér á meðan, ég sem sagt vann! Svo vakti ég mömmu klukkan hálfátta, hún setti mig í vagninn klukkan hálftíu sem mér fannst alveg hundleiðinlegt og öskraði eins og stunginn grís, en svo sofnaði ég aðeins og svaf í svona hálftíma. Núna er ég í bílnum með pabba að ná í ömmu á Akureyri, það er nú gaman að hitta hana. Hún er sko miklu skemmtilegri en þessi hundleiðinlega mömmukona sem er bara þreytt og pirruð og vond við mig, lætur mig fara að sofa og eitthvað ömurlegt.

Annars voru mamma og pabbi voða dugleg í gær, héldu áfram að flísaleggja eldhúsvegginn. Þetta er að verða mjög fínt hjá þeim. Já og við mamma fórum í ótrúlega svaðilför á föstudaginn, við fórum til Brynjars Loga að hitta öll litlu börnin vini mína , rosalega gaman, það komu 18 börn held ég í allt. Nema við fórum labbandi og í strætó, en mamma fattaði ekki að það var ausandi rigning og rok og slabb og ógeðslegt veður. Það fór náttúrulega bara fínt um mig í vagninum, en mamma var rennandi blaut inn að beini. Sem betur fer var gott þvottahús niðri hjá Brynjari Loga svo mamma gat sett vagninn inn og hengt upp rennandi blautu úlpuna sína. Svo kom nú bara pabbi og náði í okkur svo við þyrftum ekki að labba heim.

Jæja, nú er ég ekki búin að vera stillt og góð. Alla vega ekki þegar ég á að fara að sofa. Síðan við komum úr sveitinni þá vil ég helst bara sofna upp í hjá mömmu. En ég fæ það ekki, svo þá öskra ég bara. Svo þegar ég er orðin nógu þreytt, þá loksins get ég sofnað ef mamma lætur mig liggja á hliðinni og ég fæ að sjúga puttann hennar. Þá líka sætti ég mig við þumalinn minn eftir smástund. En ekki snuddu, bjakk! Ég vil hana bara þegar ég fer í vagninn. Sunna frænka passaði mig í gær á meðan pabbi og mamma fóru í jóga og ég var mjög góð við hana. Hún reyndi að gefa mér graut en það fór nú ekki mikið af honum ofan í mig. Svo í fyrradag komu vinkonur hennar mömmu í heimsókn, þeim fannst ég alveg ótrúlega sæt held ég. Svo koma amma og afi á Akureyri um helgina, það verður nú gaman að hitta þau, ég var nefnilega lasin síðast þegar þau komu þó mamma kjáni hafi ekki fattað það fyrr en seinna.

Ég fór í sveitina um helgina, við fórum öll saman í Víðihlíð ég, pabbi og mamma, og stóri bróðir. Það var aldeilis fínt, við fórum í jeppaferð og keyrðum í ís og krapa. Stóri bróðir renndi sér líka á sleða, en ég var bara inni í bíl. Það var ágætt veður, svo átti nú að koma óveður en það varð eiginlega ekkert úr því. Þegar við komum til baka fórum við til afa og ömmu í Hjallabrekku og allir fengu pönnukökur nema ég. Svo fórum við heim, ég var svolítið óróleg þegar ég átti að fara að sofa og mamma var svo þreytt að hún leyfði mér bara að sofna upp í hjá sér. Svo vaknaði ég klukkan fimm til að fá sopa og þá var ég í mínu rúmi. En eftir það fékk ég að kúra hjá mömmu. Svo er ég núna búin að sofa helling í vagninum mínum, ég var nú ósköp fegin að komast í hann aftur, ég var svolítið öfugsnúin um helgina að fá ekki vagnlúrana mína. Annars er ég alltaf núna að naga tærnar mínar ef ég fæ að vera berfætt, mér finnst það sko langbest. Síðan er ég líka alveg að fatta hvað á að gera við þennan pela, mér finnst nefnilega voða gott að súpa kalt vatn úr honum. Ég er alltaf að læra eitthvað nýtt sko.

Þá er kominn fimmtudagur. Ég fór í sund á þriðjudaginn og það var sko alveg frábært. Ég kafaði oft og mörgum sinnum, synti í hringi kringum pabba og mömmu, stóð í lófanum á pabba og ég veit ekki hvað og hvað, og það var svo gaman. Hin börnin voru samt svolítið að skæla, aðallega strákarnir sýndist mér. En ég var miklu hressari en þegar er verið að draga mann á morgnana þegar maður er vanur að kúra í vagninum sínum! Svo ég er nú að reyna að sannfæra pabba og mömmu um að vera bara frekar á þriðjudögum í sundinu. Pabbi er eitthvað stressaður því hann þarf að fara á fund alltaf á þriðjudögum, en það er nú alveg nógur tími til þess eftir sundið.

Í nótt svaf ég í fyrsta skipti í barnarúminu mínu. Það er ægilega fínt, mamma setti svona púða meðfram rimlunum svo ég flækti mig ekki í þeim og svo setti hún óróann minn líka á rúmið. Ég svaf bara vel í því, sofnaði reyndar seint því ég vaknaði við að pabbi og mamma voru að fara að sofa og horfðu á þátt í sjónvarpinu. Ég er vön sko að fara í rúmið upp úr 10, og gerði það líka í gær og var eiginlega sofnuð þegar mamma og pabbi fóru að sofa klukkan 11. En þá glaðvaknaði ég og var dálitla stund að sofna aftur. Mér leið samt alveg vel í rúminu mínu, skoðaði bara tærnar mínar og svona. Svo bara steinsvaf ég þangað til klukkan fimm í morgun. Mamma var komin með pela með vatni niður um kvöldið og ætlaði bara að gefa mér vatn og láta mig sofa í rúminu alla nóttina, en svo bara nennti hún því ekki heldur tók mig upp í rúm til sín og leyfði mér að fá mjólk. Ég var sko ánægð með það! Klukkan var líka orðin svo margt og ég var búin að vera mjög dugleg að sofa sjálf í mínu rúmi. Stundum bara vakna ég klukkan eitt eða eitthvað svoleiðis, þá kannski er nú alveg nóg fyrir mig að súpa smá vatn og sofa svo áfram í rúminu mínu.

Jæja, þá erum við mamma að fara í leiðangur í strætó og heimsækja hana Söru Mist, bumburnar ætla að hittast þar í dag og mamma hennar á afmæli, það verður örugglega gaman.

Jæja, þetta var nú meiri helgin. Á laugardaginn fór ég í sund og það gekk nú bara mjög vel. Mamma og pabbi voru pínu stressuð að ég myndi bara skæla en ég var voða dugleg. Ég gerði samt ekki allt sem hin börnin gerðu, af því ég var náttúrulega búin að missa einn tíma úr. Ég fæ bara aukatíma á þriðjudaginn í staðinn. Ég var nefnilega orðin voða þreytt þegar ég var búin að kafa þrisvar sinnum og synda nokkra hringi kringum pabba og mömmu. Ég skældi pínu, en svo hætti ég því alveg þegar við bara hvíldum okkur í smástund. Það verður gaman að fara á þriðjudaginn, þá kemur amma líka með. Jæja, svo eftir sundið setti mamma mig í vagninn og ég átti að sofa til klukkan þrjú eða svo. En ég hafði nú grun um að það væri eitthvað um að vera svo ég vaknaði bara eftir klukkutíma og vildi alls ekki sofa meira. Svo loksins tók mamma mig inn og ég fór bara að leika mér á teppinu og svona, voða góð. Svo leið alltaf lengri tími og ekki setti mamma mig aftur í vagninn, ég var nú orðin frekar þreytt. Svo fór mamma í einhvern rosa fínan kjól og pabbi í jakkaföt með skotti og Sunna frænka kom í heimsókn, ég skildi nú ekkert hvað var að gerast. En svo setti mamma mig loksins í vagninn og ég var dauðfegin því og steinsofnaði um leið. Svo eftir svona einn og hálfan tíma þá rumskaði ég og hugsaði að það væri nú best að athuga hvað væri að gerast, hvort ég væri nokkuð að missa af neinu. Þá kom Sunna frænka, ég var voða hissa, og hún líka að ég skyldi ekki sofa lengur. Ég var svolítið að kvarta í henni, hún gaf mér graut að borða en ég vildi nú helst bara drekka hjá mömmu minni. Hún var samt voða dugleg að leika við mig og ég gleymdi alveg að fara að háskæla, kvartaði bara pínu svona af og til. Svo loksins klukkan tíu kom mamma, ég vaknaði sko klukkan sex í vagninum. Hún gaf mér mjólk að drekka og setti mig í rúmið, ég var ósköp fegin að fara að sofa. En svo vaknaði ég aftur um þrjúleytið og ætlaði að fá sopa hjá mömmu. Þá var ég nú hissa því þá kom bara aftur Sunna frænka. Jæja, hún leyfði mér bara að fara upp með sængina og horfa á sjónvarpið og svo stuttu seinna kom mamma og við fórum öll að sofa. Daginn eftir vaknaði ég klukkan hálfníu, mamma var voða eitthvað lítið hress og setti mig í vagninn stundvíslega klukkan hálftíu þar sem ég svaf samfellt í átta tíma, ég var orðin svo hræðilega þreytt. Ég held að mamma hafi nú verið mjög ánægð með það, hún var eitthvað þreytt líka. Svo fór ég bara voða góð að sofa í gærkvöldi. Verst að ég kemst ekki út í vagninn minn í dag, það er brjálað óveður úti. En ég er bara í vagninum inni í herbergi hjá stóra bróður með opinn gluggann.

Jæja, og þar með vaknaði ég, æi ég var nú ekki búin að sofa lengi, bara klukkutíma. Annars má ég til með að monta mig hvað ég er góð að fara að sofa á kvöldin. Ég var bara í nokkra daga að venjast þessu, en nú bara setur mamma nýja bleyju, setur mig í náttföt og þvær mér í framan, svo leggur hún mig í vögguna og syngur Dvel ég í draumahöll og segir Vertu nú yfir og allt um kring, kyssir mig góða nótt og svo fer ég að sofa. Ég er eiginlega aldrei neitt að skæla eða neitt, stundum þarf hún að láta mig fá snudduna en oftast er ég bara góð og sofna eftir smástund. En mér finnst að mamma og pabbi verði nú að fara að láta mig fá almennilegt rúm, þessi vagga er eiginlega orðin alltof lítil fyrir mig, enda er ég að verða fimm mánaða gömul! Ég verð að ræða þetta alvarlega við þau. Jæja, best að fara með mömmu að ná í pabba minn, hann kemur alltaf heim í hádeginu og mamma er með bílinn. Hún fór að tala við einhverja ósköp góða konu á heilsugæslustöðinni og hún ætlaði að labba með mig í vagninum en það er bara svo vont veður að við urðum að fara á bílnum.

Æ hvað ég er glöð að komast loksins út í vagninn minn. Ég fékk að fara út í gær og líka í dag, áðan sofnaði ég meira að segja á meðan mamma var að hnoða mér ofan í svefnpokann, ég var svo glöð að komast í vagninn. Ég var líka rosalega dugleg áðan, mamma var að setjast með mig við eldhúsborðið og ég náði að krækja í kornfleksdiskinn hennar, sem var reyndar bara með smá mjólk í, og hellti yfir okkur báðar. Hehe, bráðum get ég örugglega farið að tæta. Stóri bróðir er rosalega góður við mig, hann var alltaf að rétta mér trúðinn minn áðan. Og hann passaði mig í gær, með Sunnu og Þórði, á meðan pabbi og mamma voru í jóga. Ég var bara frekar góð á meðan, Sunna reyndi að koma ofan í mig graut en það gekk nú ekkert sérlega vel. Svo hún bara gaf mér fullt af mandarínu og ég var mjög ánægð með það. Ég var samt óskaplega fegin þegar mamma kom og gaf mér mjólk að drekka. Mér er næstum alveg batnað af kvefinu, stundum lekur samt úr nefinu mínu og þá verð ég ósköp pirruð. Þá þurrkar mamma horið og setur saltvatn í nefið mitt. Mér finnst ferlega óþægilegt þegar hún gerir þetta, en mér líður líka miklu betur á eftir.

Ég er ósköp mikið grey núna, og mamma líka. Ég fékk 39,5 stiga hita á aðfaranótt sunnudagsins en var reyndar fljót að losa mig við hann, var orðin hitalaus um hádegi á sunnudaginn. En núna er ég ósköp kvefuð og pirruð, og mamma líka. Svo get ég auðvitað ekki sofið úti þannig að fyrir vikið verð ég ennþá meira pirruð. En þá er nú sennilega komin skýringin á því af hverju ég vildi ekki fara í sund á laugardaginn. Ég fékk ekki heldur að fara í sundið í dag en fer í staðinn bara næsta þriðjudag í aukatíma til að missa ekki úr tíma. Núna er ég að reyna að fara að sofa, ég er eiginlega alveg sofnuð, nema svo fer ég alltaf óvart með hendina og ríf út úr mér snudduna og þá vakna ég aftur. Mamma og pabbi reyna að setja dúkkuna í höndina mína og það dugar í smá stund. En svo byrja ég aftur að skæla. Ég vil helst bara að einhver sitji hjá mér og haldi í höndina mína á meðan ég sofna.

Annars var ég mjög dugleg í dag, ég velti mér af maganum á bakið. Svo var ég heillengi að skoða höndina mína í spegli, horfði til skiptis á höndina og spegilmyndina og reyndi að snerta spegilmyndina. Svo af og til leit ég upp og sá framan í mig og þá alveg skælbrosti ég. Ég er líka voða mikið að skoða tærnar mínar núna, þær eru nú alveg það flottasta sem ég hef séð. Mér tókst meira að segja loksins að koma þeim upp í mig í dag og nagaði stóru tána mína aðeins. Mömmu fannst það fyndið.

Ég fékk að smakka banana í kvöld, oj barasta ég hef nú bara ekki vitað annað eins, ég alveg kúgaðist. Ég held þetta fólk sé eitthvað ruglað, heldur að við séum apar eða eitthvað. Ég sá pabba líka borða banana í gær og ég var þvílíkt hissa, starði bara á hann. En svo er mamma líka stundum að gefa mér vatn í pelann núna af því ég er svona kvefuð, mér finnst það voða gott, hún hristir bara túttuna aðeins uppi í mér. Þá lep ég af túttunni eins og hundur. En ég skil ekkert hvað hún er svo að reyna að troða túttunni upp í mig, og hvað svo? Hvað á ég eiginlega að gera? Ég reyni bara að naga túttuna en ég held að mamma sé ekki að meina það. Jæja, skiptir ekki máli.

Þórður frændi passaði mig í gær á meðan pabbi og mamma fóru í jóga. Fyrst var ég voða góð, svo var ég alveg brjáluð og Þórður hringdi í mömmu og allt, en svo þegar þau komu heim þá var ég aftur orðin alveg góð. Þórður er svo góður að hugga mig. Ég held honum hafi samt fundist verst að geta ekki farið í Tony Hawk. En hann ætlar alla vega að passa mig aftur á morgun. Og líka stóra bróður sem er búinn að missa tvær tennur.

Jæja jæja. Þetta gengur nú ekki alveg nógu vel hjá henni mömmu, í fyrsta lagi er hún alls ekki nógu dugleg að skrifa, í öðru lagi var allt bilað hérna um daginn þegar hún ætlaði að skrifa, og í þriðja lagi var hún búin að skrifa helling rétt áðan sem týndist svo allt af því tölvan slökkti á sér. En hún gefst nú ekki upp.

Ég er ekkert svo dugleg að borða grautinn lengur, ég veit ekki alveg hvort mér finnst hann ekki góður eða hvort ég bara nenni ekki að borða hann, stundum vil ég nefnilega bara frekar sjúga þumalfingurinn sko. En mamma ætlar samt að halda áfram að reyna, hún er nefnilega að fara út að skemmta sér um næstu helgi og þá þarf Sunna frænka helst að geta gefið mér eitthvað að borða og ekki vil ég sjá pelann, oj barasta nei takk! Svo eru þau pabbi líka að byrja í jóga sem er um kvöldmatarleytið og þá væri nú ósköp fínt að Sunna frænka og Þórður frændi gætu gefið mér graut á meðan. Ég held samt að mamma nenni nú ekki að gefa mér graut í kvöld, afi og amma á Akureyri ætla nefnilega að koma í kvöldmat. Það verður nú skemmtilegt, þau verða örugglega alveg hissa hvað ég er búin að stækka mikið. Ég er líka orðin rosalega dugleg sko, ég kann að snúa mér á bakinu og líka að taka upp dót, mömmu finnst ég algjör snillingur! Það fór nú samt í verra í morgun, ég fór í sund og það var bara alveg ömurlegt. Og ég sem var búin að fá nýjan fínan sundbol og allt. Ég bara hágrét eins og ég væri nýfædd eða eitthvað. Mamma heldur að ég hafi kannski verið of þreytt, ég vaknaði svo snemma í morgun. Svo hún ætlar að fara með mig í baðið hjá ömmu og afa á morgun og synda pínu þar, og svo megum við fara í sundtíma á þriðjudaginn í staðinn.

Annars hefur það helst gerst að afmælið hans stóra bróður var haldið síðasta sunnudag. Það var mjög skemmtilegt, ég reyndar svaf í vagninum næstum allan tímann. Ég kom bara inn í svona klukkutíma og svo fór ég út aftur. Ég geri það eiginlega alltaf núna, nema í dag af því það rennur svo úr nefinu mínu þá setti mamma mig bara í húfu og svefnpokann í rúmið hans pabba. Það er líka svo mikil snjókoma úti. Annars er ég búin að vera rosalega dugleg að fara út í kulda og snjó og bara öll veður. Mér finnst svo rosalega gott að sofa úti nefnilega. Svo er ég orðin mjög góð að fara að sofa á kvöldin, svona oftast alla vega. Mamma bara leggur mig í rúmið með snudduna, ég prófa að kalla aðeins á hana en svo fer ég bara að sofa. En svo er ég að vakna yfirleitt núna um miðja nótt og þá er ég ekki eins dugleg að fara aftur að sofa. Mamma lætur oftast eftir mér að fá smásopa en ég fer samt að háskæla þegar ég á að fara aftur að sofa. Æ stundum er maður bara lítill og einmana og vill kúra hjá mömmu sinni. Samt sef ég miklu betur í vöggunni minni en uppí hjá pabba og mömmu. En það er ósköp gott að sofna uppí með brjóstið í seilingarfjarlægð.