Hvítasunnan

Um síðustu helgi var hvítasunnuhelgin, og þá var heldur betur nóg um að vera hjá okkur. Á laugardeginum komu amma Gisela og afi Jón í heimsókn, borðuðu hjá okkur og amma æfði sig aðeins í að passa Guðmund Stein því hún ætlar að hugsa um hann hérna heima í Skrúðási á meðan við hin förum að sigla í Frakklandi í byrjun júní. Afi Jón gerði líka heilmiklar æfingar með fótunum, Guðmundi Steini finnst nefnilega svo gaman að sitja hjá honum á sköflungnum og hossast.

Á sunnudaginn fórum við svo í svolítið langt ferðalag, til Ólafsvíkur. Þar var veisla sem ég skemmti mér svoleiðis ótrúlega vel í, ég horfði á vídeó og borðaði kjúklingaleggi, hitti Emil frænda minn og spjallaði dálítið við hann, og ég kynntist stelpum sem voru með mér að leika með lestarteina og lest sem gat meira að segja keyrt á teinunum. Þetta var bara með skemmtilegri veislum sem ég hef farið í!

Og á mánudeginum var síðan afmælisveisla fyrir þá frændur mína Teit Helga og Berg Mána. Það er nú alltaf mikið fjör þegar við frændsystkinin hittumst, og í þetta sinn passaði ég mig að klæða mig þannig að ég gæti leikið úti, í síðasta afmæli var ég nefnilega í fínum kjól og gat ekki leikið úti eins og mig langaði svo mikið til.

Nú, vikan er líka búin að vera viðburðarík, bæði fimleikarnir og tónskólinn eru að klárast, ég er búin að vera á stífum fimleikaæfingum fyrir lokasýninguna í dag, og svo var sellóæfing fyrir skólaslitin þar sem ég átti að spila, en mamma reyndar misskildi póstinn frá skólanum og hélt að skólaslitin væru daginn eftir æfinguna, en ekki beint eftir hana sama dag, svo ég mætti á æfinguna en missti af að spila á sjálfum skólaslitunum.

Á mánudaginn rennur svo upp dagur sem er lengi búið að bíða eftir, þá fer ég með hinum börnunum í fimm ára skólanum í útskriftarferð í Vatnaskóg og við gistum þar í tvær nætur! Ég er búin að pakka niður í útskriftarpokann minn sem ég bjó til í skólanum, í honum eru náttfötin, tannbursti, svefnfélagi og bók.

Stundum fer maður á kostum

Í gær var ég að leika við tvær vinkonur, við vorum í skólaleik og skólinn var í ferðalagi þar sem átti að fara að gista. Ég var kennarinn og þegar var kominn háttatími í leiknum þá sagði ég, "jæja farið nú að sofa krakkar mínir, þið megið reikna uppi í rúmi". Ég var sko ótrúlega góður kennari að leyfa þeim það.

En á föstudaginn, þá var Guðmundur Steinn kominn með eyrnabólgu og það lak ógeð út úr eyranu á honum. Ég var við hliðina á honum í bílnum og var eitthvað að fárast yfir þessu, svo mamma fór að segja mér frá því þegar ég var lítil og fékk eyrnabólgur. Svo spjölluðum við eitthvað um það, svo langaði mig að heyra fleiri sögur og sagði við mömmu, "segðu mér meira frá því ég var lítil, samt ekki um eyrnabólgu, ég fæ taugaáfall ef ég heyri meira um eyrnabólgu!"

Mánuður liðinn

Það verða komin jól aftur áður en maður veit af! Á þessum mánuði síðan ég skrifaði síðast er margt skemmtilegt búið að gerast. Við fórum til Akureyrar að heimsækja ömmu og afa, þar fór ég í skíðaskóla og varð algjör skíðasnillingur. Skólinn var frá tíu til tvö bæði laugardag og sunnudag, og við fengum pizzu í hádeginu. Ég eignaðist margar vinkonur og skemmti mér konunglega. Helst vildi ég ekkert hætta að renna mér þó ég væri orðin alveg dauðþreytt og stæði varla í lappirnar.

Mamma og pabbi fóru til Marokkó og það var víst mjög gaman og mikil upplifun. Þau fóru meira að segja í loftbelg og allt. Við Guðmundur Steinn vorum fyrst hjá ömmu og afa í tvo daga og svo fengum við að fara til Silju og gista þar eina nótt. Ég keppti á fyrsta fimleikamótinu á meðan mamma og pabbi voru í Marokkó, á Ponsumóti þar sem ég stóð mig auðvitað mjög vel þó við ynnum nú ekki. Afi fór með mér og tók fullt af vídeómyndum svo mamma og pabbi gætu séð hvað ég var flink.

Ég er mikið búin að vera úti í góða veðrinu, á trampólíni og í heita pottinum og svo er ég búin að vera mjög dugleg að æfa mig á línuskautum. Það er svo gaman þegar vorið er komið og hægt að vera úti að leika.

Ein þreytt

Af einhverjum ástæðum var ég svo ótrúlega þreytt í skólanum í dag, að ég lagðist bara á dýnu inni í leikstofu og svaf þar í dágóða stund. Það getur nú aldeilis verið heppilegt að hafa leikstofu með góðum dýnum, mamma væri stundum alveg til í að leggja sig svona á daginn.


Um síðustu helgi drifum við okkur loksins í Bláfjöll. Ég fékk leigð skíði og renndi mér eins og herforingi í brekkunum. Ég datt náttúrulega nokkrum sinnum og kunni ekkert að beygja en ég hafði engar áhyggjur af því. Pabbi hjálpaði mér nú dálítið, ég gat hvorki staðið upp sjálf né komist upp að lyftunni, en ég gat hins vegar alveg farið ein í diskalyftunni, og það margar ferðir meira að segja. Ég var ótrúlega montin af sjálfri mér! Sigurður Pétur var líka mjög flinkur á snjóbrettinu og Guðmundur Steinn tók sig vel út á snjóþotunni.





Og páskarnir já, þeir voru bara frábærir eins og alltaf. Við fórum í páskaeggjaleit úti í brekkunni í Víðihlíð á föstudaginn langa. Mamma vill nefnilega endilega draga fram páskaeggin fyrir páskadag svo það sé hægt að narta í þau í páskafríinu. Á páskadag fékk amma síðan þá frábæru hugmynd að gera aðra eggjaleit, í það skiptið harðsoðin egg sem voru falin í stofunni. Síðan máttum við lita á eggin, og loks borða þau. Mér fannst eggjaleitin það skemmtilegasta við páskafríið. En svo var líka margt annað mjög skemmtilegt, eins og að leika úti í snjónum með bræðrum mínum og hundinum, renna sér niður brekkur á snjóþotu eða á maganum, fara í heita pottinn og lesa, ekki má gleyma því. Ég las næstum því alla Sigrún fer á sjúkrahús, alveg sjálf. Og lét les hana nokkrum sinnum fyrir mig. Ég las líka Drekann með rauðu augun og Ólympíustrumpinn. Það er alltaf svo ótrúlega gaman að vera í Víðihlíð, og sérstaklega þegar margir eru.

Vangaveltur

Bíltúrinn í og úr sellótímum er nokkuð langur og margt hægt að grufla og skrafa á leiðinni. Í dag var mér sérstaklega hugleikið yfirvofandi páskafrí og ég var mikið að velta fyrir mér nákvæmlega hvenær ég yrði sótt í skólann á morgun, hvenær við myndum leggja af stað í Víðihlíð og hvenær ég ætti að pakka niður dótinu mínu (eða pakka inn). Helst vildi ég nú fá frí í dag til að pakka, en það var ekki í boði. Jæja, nema hvað að svo byrjar lag í útvarpinu og ég verð svona líka spennt og glöð með það og segi, "þetta er svona um frí". Mamma var pínu hissa því hún mundi ekki eftir neinu um frí í textanum. En svo kom viðlagið - já það er lotterí og ég tek fátt í frí!

Svo á leiðinni í skólann (eftir að við vorum búnar að komast að því að tónskólinn er farinn í páskafrí) var ég komin í aðrar hugleiðingar og sagði allt í einu upp úr þurru við mömmu, "Ég veit hvernig maður getur búið til kind. Maður tekur bara svona ull og svo tekur maður einhvern haus og eyru og setur á, og svo fullt af fótum. Og þá er komin kind!" Ekki mikið mál sko. Mamma spurði hvort þær fæddust ekki sem lítil lömb, jújú ég vissi það alveg, en það er sko líka hægt að búa til kind svona, maður þarf bara að finna einhvern haus og eyru og fætur.

Búningadagur

Það var svo gaman á öskudaginn hjá okkur í skólanum að frábæru kennararnir okkar ákváðu að hafa annan búningadag, sem er í dag. Það voru smá vangaveltur yfir þessu í gær, fyrst stakk ég upp á því að kaupa búning en mömmu fannst nú ekki alveg ástæða til þess þar sem ég heilan helling af búningum sem ég hef fengið fyrir öskudaga, í jólagjöf og frá stóra bróður. Við rifjuðum aðeins upp hvaða búninga ég ætti, en svo allt í einu vissi ég nákvæmlega hvað ég vildi vera, draugur! Svo við fundum sængurver í gær og klipptum það til þangað til ég var orðin ótrúlega flottur draugur. Og fyrst vissi engin hver ég var þegar ég mætti í skólann í morgun :-D

Mikið að gera

Já það er sko nóg að gera hjá manni þó maður sé bara fimm ára. Ég er í skólanum flesta daga til fimm. Þegar ég kem heim vil ég helst fara út að leika við vinkonu, sérstaklega þegar veðrið er gott og alveg að koma sumar eins og mér finnst stundum vera. Tvisvar í viku eru fimleikaæfingar (á milli sex og sjö, mikið hlökkum við öll til þegar bærinn og íþróttafélagið verða búin að semja um að hafa æfingarnar á þeim tíma sem tómstundastarfið í skólunum er) og svo les ég núna eina lestrarbók á hverjum degi og spila daglega æfingamatseðilinn minn á sellóið. Mér finnst svo spennandi að fara eftir honum og lesa hann sjálf. Á honum er núna: Risakóngur Ragnar, eitt tilbrigði við samloku, Gulur rauður 2x, Parísarhjólið 3x, Söngur vindsins 2x, Halti grái hérinn, og svo er ég að læra fyrstu línuna í Signir sól.

Það er margt og mikið búið að gerast hjá mér síðan ég skrifaði síðast, enda var það fyrir mjög löngu síðan. Ég man nú ekki eftir því öllu, né hverju ég var búin að segja ykkur frá. En ég var alla vega ekki búin að segja ykkur frá því að ég fór um síðustu helgi í nafngiftarveislu hjá lítilli dömu sem fékk það fallega nafn Guðlaug Nóa. Við mamma fórum saman í veisluna, en Guðmundur Steinn varð að vera heima með pabba því hann var búinn að vera svo lasinn. Ég skildi það nú aldeilis fljótt, "Guðmundur Steinn má ekki koma í veisluna", sagði ég. "Hann gæti smitað alla og þá myndi hann eyðileggja veisluna. Þá yrði hann skammaður, er það ekki mamma!". Þá skellti mamma nú upp úr þegar hún sá fyrir sér Guðmund Stein fá orð í eyra, og alla veislugestina liggjandi í bráðsmitandi instant veikindum. Nei þá var nú betra að geyma hann bara heima.

Mest spennandi framundan er auðvitað páskafríið, ég er löngu byrjuð að telja niður dagana og hlakka mikið til að fara í Víðihlíð. Ég vona að það verði snjór svo við getum leikið okkur úti í snjónum, eða að það verði ekki snjór svo við getum rúllað okkur niður brekkuna. Svo eftir það er það ferðin til Frakklands sem við ætlum að fara með ömmu og afa í júní. Við ætlum að fara að sigla á bát, ég er mjög spennt að sjá alla krókódílana og hákarlana og sjávardýrin. Mamma og pabbi eru með einhverjar efasemdir um að það sé svo mikið líf í skipaskurðunum, en ég hlusta sko ekkert á það.

Fárveik

Nú er ég eins veik og ég hef nokkurn tímann orðið. Í gær var ég með mikla hálsbólgu og rúmlega 38 stiga hita, og í dag er ég búin að vera með 39-40 stiga hita og liggja í sófanum í allan dag. Mér fannst ósköp leiðinlegt í gær að vera lasin og vildi endilega fá að heimsækja vinkonu undir kvöldið þegar mér fór að líða aðeins betur, en í dag er ég bara búin að vera of lasin til að láta mér leiðast.

En það eru nú ekki tóm leiðindi samt, því á sunnudaginn átti stóri bróðir minn hvorki meira né minna en ellefu ára afmæli. Það var rosalega flott veisla fyrir bekkjarbræður hans með rjúkandi þurrís, gerviflugum, beinagrindum og Harry Potter bíói. Ég var mjög spennt fyrir því að vera með stóru strákunum, en svo á endanum var nú miklu skemmtilegra að leika bara við hana Hugrúnu bróðursystur mína. Ég hélt fyrst að hún væri ennþá svo mikið smábarn og vildi ekkert að hún væri að leika með Pet Shop dótið mitt og svoleiðis. En hún er ekkert smábarn lengur, orðin þriggja og hálfs árs og við getum sko vel leikið okkur saman.

Stórt skref

Nú er ég orðin svo stór að ég fékk að gista hjá vinkonu minni, henni Kristínu Kolku. Það var ótrúlega gaman hjá okkur og við vorum mjög duglegar. Mamma hennar sótti okkur báðar í skólann og við fórum heim til Kristínar. Við vorum svo spenntar að vera að fara að gista saman að við fórum beint í náttfötin. Svo lékum við okkur í fimleikaæfingum og alls kyns skemmtilegum leikjum, borðuðum fullt af fiski í kvöldmat og fórum svo prúðar og góðar að sofa á dýnu undir sömu sæng. Við vildum nefnilega alls ekki fá aukasæng, við vildum bara kúra okkur saman. Daginn eftir fór svo mamma hennar með okkur í skólann og mamma og pabbi hittu mig ekki fyrr en eftir þann skóladag. Þeim fannst þetta nú dálítið skrýtið en mér fannst þetta ekkert mál.

Líf og fjör

Heldur betur er þetta búið að vera skemmtilegt jólafrí. Ég fékk frábærar gjafir sem ég var rosalega ánægð með, á aðfangadag fékk ég að opna þrjá pakka og mér fannst það dásamlegt. Á jóladag fékk ég svo að opna ennþá fleiri pakka og það var geggjað fjör. Ég fór líka út í snjóinn með Sigurði Pétri, það var ekki síður gaman. Svo komu öll frændsystkini mín í pabba fjölskyldu í mat um kvöldið (og pabbar þeirra og mömmur líka) og við fórum líka út að leika í snjónum eftir mat. Á annan í jólum fórum við til ömmu og afa í Hjallabrekku og þar lék ég við Júlíu frænku mína. Daginn eftir, þ.e. í gær, var svo sparijólaballið og þá hittist svo skemmtilega á að Kristín Kolka var þar, svo okkur leiddist nú heldur betur ekki. Í dag var síðan jóla-náttfatapartíið mitt langþráða, ég fékk að bjóða nokkrum vinkonum í náttfatapartí um hádegisleytið. Það var svo gaman hjá okkur, við fengum pizzu og snakk, hlustuðum á tónlist, fórum í leiki og lékum okkur í herberginu mínu. Mamma og Guðmundur Steinn voru líka í náttfötum og dönsuðu með okkur. Svo kemur smá pása núna um helgina, en svo fáum við gesti á gamlárskvöld og líka á nýárskvöld og svo koma amma og afi á Akureyri vonandi eftir áramótin. Mikið finnst okkur við heppin að hafa allt þetta skemmtilega fólk í kringum okkur.

Jólaklippingin

Mamma mín fór í klippingu rétt fyrir jólin og samþykkti að leyfa hárgreiðslukonunni að "ýta aðeins undir rauða litinn". Svo hárgreiðslukonan bara valdi litina og litaði hárið á mömmu. Og það er skemmst frá því að segja að ég fékk hláturskast þegar hún kom að sækja mig í skólann. Ég hló og hló og kom ekki upp orði í langan tíma. Svo loksins þegar ég var aðeins farin að jafna mig þá spurði mamma hvort hún væri ekki fín, "nei þú ert fyndin" sagði ég bara. Svo fór hún að sækja Guðmund Stein og hann var bara alls ekkert viss um að þetta væri rétt mamma, hann kom til hennar með hálfgerðum semingi og þegar hann var kominn í fangið á henni leit hann aftur á fóstrurnar sínar til að gá hvort þetta væri örugglega rétt, hvort hann ætti örugglega að fara heim með þessari konu. Liturinn var sem sagt vel dökk rauður og mikil breyting á mömmu okkar. En núna þegar við erum öll búin að venjast þessu þá finnst okkur þetta bara mjög fínt :-)

Jólakveðja

Kæru vinir, frændur og frænkur, afar og ömmur og allir aðrir. Sökum ýmissa tölvutengdra vandamála á heimili tölvunarfræðinganna tveggja varð ekkert úr sendingu jólakorta þetta árið. Í staðinn kemur jólakveðjan hér í þetta sinn (og Guðmundur Steinn ætlar líka að senda jólakveðju).

Þetta er búið að vera skemmtilegt og viðburðaríkt ár hjá mér eins og fleirum í fjölskyldunni. Ég byrjaði í skóla, Barnaskóla Hjallastefnunnar, og ég byrjaði líka að læra á selló. Ég fór til Þýskalands að hitta ættingja og til Svíþjóðar að heimsækja Sunnu og Magga og líurnar litlu tvær (Emilíu og Júlíu). Svo fór ég í margar skemmtilegar heimsóknir, hélt veislur og margt fleira. Ég sendi hoppandi og skoppandi jólakveðjur til ykkar allra með kærum þökkum fyrir góðar stundir á árinu. Ég hlakka til að heimsækja ykkur flest sem fyrst og helst fá að gista, það finnst mér skemmtilegast.

Jólakossar og knús frá Rósu Elísabetu og fjölskyldu

Upprennandi sellósnillingur

Í dag spilaði ég í fyrsta skipti á sellóið mitt á tónleikum. Það gekk mjög vel hjá okkur, við spiluðum Löggan segir stopp stopp og Risakóngur Ragnar og spiluðum alveg eins og englar. Ég var bara pínu súr að fá ekki að spila meira. En ég jafnaði mig nú fljótt á því. Á eftir var svo jólaball og það kom jólasveinn og allt. Ég var aldeilis ekki feimin við hann eins og ég var nú stundum í gamla daga, hann meira að segja tók mig í fangið og sýndi öllum að ég væri með stjörnur í augunum af því ég er búin að vera svo stillt og góð (eins gott að hann veit greinilega ekki alveg allt... ;-) jújú, ég er alltaf mjög stillt og góð). Svo dönsuðum við í kringum jólatré og fengum kökur. Heldur betur var þetta flott.

KK

Ein lítil saga af mér, ég spurði mömmu hver væri að syngja lagið í útvarpinu. Mamma sagði, "hann er kallaður KK en hann heitir Kristján Kristjánsson". "Er hann kallaður KK?", spurði ég, það fannst mér skrítið. "Segir mamma hans þá svona, KK, komdu inn að borða..."

Svíþjóðarferð

Jæja gott fólk. Það verður nú að segjast að eini gallinn við nýju vinnuna hennar mömmu er hvað hún hefur lítinn tíma. Það eina sem hún gerir er að vinna, sofa og sinna okkur systkinunum. Allt annað situr á hakanum, eins og til dæmis að skrifa á síðurnar okkar og fara í gegnum myndir. En við tókum okkur smá frí um síðustu helgi og fórum í heimsókn á Gamla Brómsteinsveginn að hitta nýju frænkuna okkar og auðvitað ekki síður stóru systur hennar og foreldra. Það var nú aldeilis dandalafín ferð. Við fórum að skoða húsið hennar Línu og þakið hans Kalla á þakinu í Junibacken, skoðuðum Vasa safnið og skemmtum okkur ótrúlega vel við að fikta í alls kyns tilraunum í Tom Tits Experiment (þetta er ekki dónalegt Tits heldur sænskt). Þetta var allt saman alveg stórkostlega skemmtilegt og okkur systkinunum finnst Svíþjóð alveg frábært land.

Til viðbótar við þetta höfðum við það ósköp gott hjá Sunnu og Magga, ég fór út á róló með Sunnu og Júlíu, við bökuðum piparkökur, lékum okkur öll saman, við Júlía vorum duglegar að lita og hlusta á tónlist saman, og við Sigurður Pétur náðum að búa til snjókarl í garðinum. Við þökkum höfðingjunum á Gamla Brómsteins kærlega fyrir okkur og hlökkum mikið til að hitta þau aftur eftir tvær vikur hérna á Íslandi.

Nú, það fór hins vegar verr með heimferðina. Það byrjaði á því að mamma fékk gubbupest nóttina áður en við fórum. Hún hélt samt að þetta yrði allt í lagi og við komum okkur öll út á flugvöll, mamma frekar drusluleg. Inni á flugvellinum byrjaði ég síðan að gubba, og Sigurður Pétur byrjaði í flugvélinni. Guðmundur Steinn var hins vegar eldhress allan tímann og harðneitaði að sofa í flugvélinni. Þetta var því ansi skrautlegt ferðalag og við vorum mikið fegin þegar það var búið.

Vangaveltur

Þegar ég var lítil fundust mér svona tómatabrandarar fyndnir. Það eru sko svona brandarar um tómata sem voru að labba yfir götuna og svo var keyrt yfir þá. En núna finnst mér þetta ekkert fyndið því þeir myndu bara slasast, eins og Gabríel þegar það var keyrt á hann.

En fimleikakennarinn minn, hún var einu sinni í landsliðinu í fimleikum, af því að hún var alltaf svo þögul á æfingum.

Slasaður sellósnillingur

Á föstudaginn var ég að fara handahlaup í skólanum og rakst með fótinn í ofn. Ég fékk mjög hræðilegt sár, það var sko þannig að skinnið var út úr mér og kjötið líka! (Innskot frá mömmu: þetta var smá skeina, þurfti varla plástur).

Í gær fór ég í fyrsta skipti í hóptíma í selló, það var mjög skemmtilegt og ég var mjög dugleg. Við hrærðum í potti með boganum, gerðum þvottavél og rakettur. Svo spiluðum við Löggan segir stopp, stopp, Fá epli, Risakóngur Ragnar og Pínulitlar piparkökur. Mér fer mjög hratt fram á sellóið, enda er ég yfirleitt dugleg að æfa mig.

Sund og slys

Í gær var ég búin að vinna mér inn 10 broskalla fyrir að vera dugleg að æfa mig á sellóið og fékk þess vegna að fara í sund með mömmu. Við fórum í Árbæjarlaugina og á leiðinni kannaðist ég alveg við mig og var að rifja upp þegar ég fór í Árbæinn með Kristínu Kolku vinkonu minni í fyrrasumar. Þegar við vorum síðan búnar að vera dálitla stund í sundinu, hvern hittum við þá nema Kristínu Kolku! Það voru sko fagnaðarfundir, við lékum okkur saman góða stund og fórum óteljandi ferðir í rennibrautina. Það var ótrúlega skemmtilegt.

Þegar við mamma vorum síðan að klæða okkur sá mamma að pabbi var búinn að reyna að hringja í okkur svo hún hringdi í hann til baka. Þá sagði hann að það hefði verið keyrt á Gabríel og hann væri slasaður. Grey Gabríel, okkur mömmu dauðbrá og við brunuðum heim eins hratt og við máttum. Gabríel kom á móti okkur og fagnaði okkur þegar við komum heim, og hann gat alveg labbað, en hann var samt með slæmt sár á einum fætinum svo að mamma fór með hann til dýralæknisins. Læknirinn tók mynd af fætinum hans en hann var sem betur ekki brotinn. Svo setti læknirinn umbúðir og gaf honum sýklalyf og verkjalyf. Vonandi grær þetta vel, grey óþekki hundurinn okkar.

Veisluhöld

Þá er heldur betur búið að halda upp á afmælið mitt. Í gær komu vinkonur mínar úr skólanum og við héldum fiðrildaveislu með fiðrildaskrauti, fiðrildatattúi og fiðrildaköku. Það var mjög gaman, nema mér fannst pínu erfitt að stelpurnar skyldu ekki gera allt eins og ég vildi. En svo jafnaði ég mig alveg og ég var mjög ánægð með veisluna.

Í dag kom svo öll fjölskyldan og hélt upp á bæði afmælið mitt og afmælið hans Nonna frænda. Mamma gerði Hello Kitty köku handa mér fyrir þá veislu, enda er ég mjög hrifin af Hello Kitty þessa dagana. Ég fékk einmitt Hello Kitty dagbók í afmælisgjöf í gær og skrifaði í hana: "Kæra dabók í dag var amæli ða komu flt af gestum" og svo á aðra blaðsíðu þetta: "Á morgun er anað afmli"

Og hérna sjáið þið mig svo brosa mínu blíðasta afmælisbrosi, á meðan Gabríel stendur vörð í stofuglugganum fyrir aftan mig. Þetta voru frábær afmæli og ég er alsæl með gjafirnar og veislurnar og alla skemmtunina.

Ekki snillingur

Mamma kallaði mig snilling áðan. Ég leiðrétti hana snarlega og sagði að ég væri ekkert snillingur, ég hefði til dæmis ekki fundið upp símann. Um daginn var mamma að tala við Sunnu frænku í símann og sagði mér seinna að hún hefði beðið að heilsa. Ég skildi ekki alveg hvað þýddi, en svo fattaði ég það, "já sendi hún broskall" sagði ég.

Ömurlegt

Ég ætlaði að halda fínu fiðrildaveisluna mína í dag, við mamma vorum búnar að skreyta ótrúlega flotta fiðrildaköku og ég var búin að blása upp fullt af blöðrum og allt orðið svo fallegt og fínt. Og svo er ég komin með gubbupest :-( Ég var ömurlega fúl yfir að þurfa að fresta veislunni, en það eru allir í fjölskyldunni búnir að lofa að vera góðir við mig í dag og leika við mig, og við ætlum að borða fiðrildakökuna saman og svo búum við til nýja fiðrildaköku fyrir næsta laugardag því þá ætla ég að hafa veisluna sem átti að vera í dag.

Fimm ára!

Hvorki meira né minna en fimm ára er ég orðin, húrra fyrir mér! Ég byrjaði daginn á því að láta syngja fyrir mig afmælissönginn og svo föndraði ég mér afmæliskórónu. Ég fékk líka að leita að einum litlum pakka, og var afskaplega ánægð með tröllasögudiskinn sem mig var búið að langa mikið í. Svo fór ég með kórónuna mína á höfðinu í sellótíma og sellókennarinn spilaði afmælissönginn fyrir mig. Mamma brunaði síðan með mig í skólann og þar var beðið eftir mér til að fara að baka afmæliskökuna.

Eftir skóla fékk ég að leita að fleiri pökkum og svo komu amma og afi með ennþá fleiri pakka og meira að segja líka pakka frá Sunnu og fjölskyldu og Þórði. Svo ég fékk fullt af pökkum til að opna, og ég var alveg sérlega ánægð með gjafirnar, takk fyrir mig allir saman!

Næstu tvo sunnudaga ætla ég svo að halda veislur, það verður fjör. Ég er búin að vera að skipuleggja í um það bil ellefu mánuði, ég ætla nefnilega að hafa fiðrildaveislu fyrir vinkonur mínar og mamma bara vonar að veislan sú eigi eftir að standa undir væntingum.

Já svo er það nú annað í stórfréttum að ég er búin að eignast tvær litlar frænkur, eina fékk ég í afmælisgjöf sem er ömmustelpa hennar Ástu frænku og svo er hún litla krúttmús frænka mín sem fæddist í Svíþjóð síðasta miðvikudag. Svo nú er Júlía orðin stóra systir, eins og ég. Mér finnst það dálítið skrítið því hún er eiginlega bara litla barn. Sunna á eiginlega tvö litlu börn núna.

Speki

Á laugardögum er ekki leikskóli og skóli, þá er frí svo maður geti þvegið fötin og svoleiðis.

Maður á að taka tillit til annarra. Mér finnst mamma stundum ekki taka nógu mikið tillit til mín þegar hún leyfir mér ekki eitthvað. Mömmur eiga að taka tillit til barnanna sinna. Ég fylgist líka vel með í umferðinni hvaða bílar eru að taka tillit til annarra og hverjir ekki.

Ég er byrjuð í sellótímum og búin að fá lánað selló. Ég er mjög spennt yfir þessu og vil helst fá að spila með sprotanum (boganum). Enn sem komið er er ég þó eiginlega bara búin að læra að standa bein, hneigja mig, sitja bein og sitja með sellóið. Ég hlakka mikið til að læra meira og fara að spila fallega tónlist.

Æðislegt

Það er svo gaman í skólanum, oftast þegar pabbi og mamma spyrja hvernig dagurinn hafi verið þá svara ég, það var æðislegt! Stundum segi ég reyndar að það hafi verið hundleiðinlegt og ég hati skólann, en þá er það yfirleitt af því að ég er eitthvað pirruð út í Guðmund Stein eða Gabríel. Svo hálfri mínútu seinna er það gleymt og þá var dagurinn aftur æðislegur. Í dag ætlar mamma hennar Kristínar Kolku vinkonu minnar að sækja okkur báðar og ég fæ að fara með þeim heim. Ég hlakka mikið til, það er svo langt síðan við höfum leikið saman, hún er bara nýkomin aftur úr sumarfríi. Ég er búin að brýna það vel og vandlega fyrir mömmu að hún eigi alls ekki að sækja mig.

Skólastúlka

Og þá var loksins komið að því, eftir allt þetta sumarfrí, að ég byrjaði í skóla. Ég var búin að bíða lengi eftir þessum degi og síðustu dagana hérna heima áður en skólinn byrjaði var ég orðin mjög óþreyjufull. Mamma keyrði mig í skólann fyrsta daginn, ég byrjaði á því að fá skólaföt og skipta um föt því mér fannst ekki koma til greina að vera í öðru en skólafötum í skólanum. Svo bara dreif ég mig inn og fór að borða morgunmat, mundi varla eftir því að kveðja mömmu einu sinni. Dagurinn gekk mjög vel og ég var ánægð og upp með mér að vera orðin Barnaskólastúlka. Ég var nú samt dálítið lúin þegar ég kom heim og í smástund þurfti ég að sitja í mömmufangi og gráta svolítið. Eiginlega ekki yfir neinu sérstöku, ég var bara svona aum og lítil í mér í spennufallinu. En svo jafnaði ég mig alveg og daginn eftir var ég spennt og kát að fara í skólabílinn og kom svo heim með honum aftur í lok dagsins. Mikið fannst mömmu ég vera orðin stór og dugleg stúlka.

Pabbi er í útlöndum að vinna. Í skólanum í dag skrifaði ég honum bréf og bað mömmu að fara með það á pósthúsið. Það er sko ekki hægt að senda það í tölvunni því það er búið að skrifa það á blað. Pabbi reyndar kemur heim á morgun, en bréfið á samt fyrst að fara til hans fyrst. Það er svona:
Elsku pabi ég vona að ðú komi heim frá Rósu knús go kosar

Síðasti kafli í sumarfríinu

Við enduðum sumarfríið á því að fara í Víðihlíð í nokkra daga. Það var mjög notalegt eins og alltaf, og alltaf jafn gaman að þvælast um móana, finna krækiber og fjallagrös og lúpínufræ til að borða, gleym-mér-eiar (hvernig skrifar maður það eiginlega? ekki eyjar...) til að líma á sig, greinar, spýtur, steina og alls kyns gersemar. Eins og oft áður skoðuðum við þjóðveldisbæinn og Hjálparfoss, fórum í sund í Reykholti og borðuðum ís í Árnesi. Við stóru systkinin fengum að fara á hestbak á Hestakránni og ég fékk að fara heillangt út fyrir gerðið, þó ég sé bara fjögurra ára. Mamma sagði að ég hefði fengið að fara eins langt og átta ára! Sigurður fékk samt að fara aðeins lengra, enda er hann tíu ára og búinn að fara á tvö hestanámskeið.

Eftir allt þetta sumarfrí var síðan alveg ágætt að koma heim og slappa af. Þegar við vorum búin að vera heima í svona tvo-þrjá daga tók ég upp á því að skríða upp í rúm undir hádegið og leggja mig í svona klukkutíma. Ég var greinilega orðin dálítið þreytt eftir allt fjörið í fríinu.

Áfram um sumarfríið

Jæja, næsta verkefni í sumarfríinu var að fara til Þýskalands. Það var nú ekki lítið sem við systkinin vorum búin að bíða eftir því, og við áttum í smá vandræðum með að fara að sofa nóttina áður. Við áttum hins vegar ekkert erfitt með að vakna um miðja nótt og drífa okkur út á flugvöllinn. Þetta var allt svo ótrúlega spennandi, við sváfum ekkert í flugvélinni og heldur ekkert í bílaleigubílnum á leiðinni í húsið. Ég átti kannski smá erfitt með skapið mitt, og fékk til dæmis dálítið mikið brjálæðiskast yfir helvítis ógeðslega smábarnastólnum sem ég átti að sitja í. Svo kom í ljós að hann var hvort sem er of lítill, svo ég fékk sem betur fer sessu í staðinn. Þegar við komum síðan í húsið hittum við Silju frænku og alla frændurna og ég var aldeilis ekki á því að ég væri neitt þreytt, ónei alls ekki! Ég vildi endilega fara út að leika og var í miklu fjöri alveg fram á kvöld, þá loksins samþykkti ég að leggjast út af og ég held ég hafi verið sofnuð áður en ég var búin að loka augunum.

Nú, svo var náttúrulega bara endalaust fjör hjá okkur. Við hittum ættingja okkar í Þýskalandi á veitingastað í kastala, við krakkarnir lékum okkur í kastalanum og fórum margar ferðir upp í turninn, ótrúlega spennandi og skemmtilegt. Við fórum líka í siglingu á ánni Neckar sem rann þarna um, skoðuðum húsið þar sem amma Gisela átti heima, fórum í tívolí, sundlaugagarð, dýragarð, og náttúrulega lékum okkur saman frændsystkinin.

Síðustu nóttina voru allir farnir nema við fjölskyldan og afi Jón, og þá gistum við í kastalanum sem var rétt hjá okkur. Það var mjög spennandi og ævintýralegt. Við löbbuðum niður í þorpið, sem var mjög erfitt, það voru eitthvað yfir hundrað tröppur (ég taldi þær allar en við mamma erum búnar að gleyma tölunni). Við höfðum ætlað að kíkja í búðir en þetta var pínulítið þorp og allar búðir voru lokaðar á laugardegi. Svo kom allt í einu hellidemba svo þá flýðum við inn á næsta kaffihús og fengum okkur ís. Svo þrömmuðum við upp allar tröppurnar aftur, mamma og pabbi með Guðmund Stein í kerrunni á milli sín. Það var ekki auðvelt.

Við fórum svo í flugvélina heim seint um kvöld. Þá vorum við orðin frekar lúin og alveg til í að leggja okkur, Guðmundur Steinn sofnaði áður en vélin var komin á loft en ég skoðaði litabókina sem ég fékk og borðaði matinn hans Guðmundar Steins, bað svo um teppi og steinsofnaði á stundinni. Það var síðan ósköp notalegt að koma heim og leggjast í rúmið sitt.

Sumarfríið

Þá er þessu sumarfríi um það bil að ljúka, og loksins loksins fæ ég að fara í Barnaskólann. Ég byrja á mánudaginn, ekki á morgun heldur hinn, og hlakka mikið til að byrja í skólanum og hitta allar vinkonur mínar aftur.


Við erum búin að þvælast ýmislegt í fríinu. Við byrjuðum á því að skella okkur í útilegu vestur á Skarðsströnd. Það var dálítið langt að keyra og tók langan tíma að finna stað til að tjalda á. Ég var orðin dauðþreytt á þessu þegar við loksins komumst í tjaldið seint um kvöld, og um nóttina hélt mig áfram að dreyma um þetta vesen svo ég kvartaði upp úr svefni, "ég nenni ekki að bíða svona lengi!". Við höfðum það annars mjög fínt í tjaldinu, skoðuðum okkur um á svæðinu, fórum í sund og svona þetta hefðbundna. Við fórum líka í siglingu og gönguferð um Skáleyjar með leiðsögn, það var mjög skemmtilegt. Við enduðum svo útileguna á að koma við á víkingabænum að Eiríksstöðum og það fannst okkur systkinunum alveg frábært. Við fengum meira að segja að kaupa víkingadót, sem var nú eiginlega toppurinn.


Og þetta var fyrsta vers, meira síðar þar sem við Guðmundur Steinn nennum ekki að leyfa mömmu að vera í tölvunni lengur.

Heimspekilegar umræður við kvöldmatarborðið

Sigurður Pétur: Ég veit hvað er erfið spurning. Hvernig skapaðist heimurinn.
Rósa Elísabet: Það er nú ekki erfitt. Hver skapaði heiminn, það er Guð.
Sigurður Pétur: Og hver var fyrsti maðurinn, það er líka erfið spurning.
Rósa Elísabet: Nei það er ekkert erfitt, fyrsti maðurinn var í gamla daga.

Svona er nú lífið miklu einfaldara þegar maður er fjögurra ára heldur en tíu ára.

P.s. Erum á kafi í sumarfríi, fréttir af okkur koma síðar

Eðli

Ég á nokkrar dúkkur og ýmislegt þeim tilheyrandi. Mér finnst alveg gaman að leika mér með þetta, sérstaklega með vinkonum mínum, en ég hef aldrei tekið neina dúkku í sérstakt uppáhald og gefið henni nafn eða sofið með hana. En hins vegar er lítil græn gúmmíeðla í miklu uppáhaldi hjá mér núna. Hann heitir Eðli og ég sef með hann í lófanum. Svona er ég eðlileg.

Annars er ég öll krambúleruð núna, á föstudaginn datt ég á gangstéttinni og hruflaðist um allt, þó verst á öðru hnénu. Svo er ég búin að detta nokkrum sinnum í viðbót og skrapa smá skinn. En verst var þó þegar ég festist í pípuhliðinu í Víðihlíð á mánudaginn. Ég var að labba og svo allt í einu datt ég og annað hnéð var alveg pikkfast. Mamma og pabbi héldu næstum að þau yrðu að skilja mig eftir, eða alla vega fótinn. En sem betur fer tókst pabba að toga hann lausan, svo fékk ég risastóra marbletti og bólgnaði öll í kringum hnéð.

Útilegan

Fyrsta tjaldútilegan okkar í langan tíma var núna um síðustu helgi. Við fórum nefnilega ekkert í fyrra, mamma letihaugur var með svo feita bumbu að hún nennti ekki í tjald. En nú drifum við okkur á útileguættarmót hjá afa Jóni og systkinum hans. Það var einfaldlega í stuttu máli sagt alveg frábærlega skemmtilegt. Ég eignaðist fullt af vinum og vinkonum og lék mér í alls konar leikjum með þeim út í eitt, langt fram á kvöld.

Á laugardaginn fórum við í bíltúr um Snæfellsnesið og fórum í lautarferð í góða veðrinu með Silju frænku og fjölskyldu. Á sunnudaginn fórum við aftur í bíltúr um nesið og amma og afi fóru líka með. Það var nú ekki alveg eins gott veður, en við fórum samt í smá lautarferð þangað til fór að rigna á okkur.

Gabríel var með okkur og var ótrúlega duglegur, hann lá á gólfinu í bílnum og var ekkert bílveikur. Svo hljóp hann um tjaldstæðið og lék við hina hundana og krakkana, yfir sig glaður og hamingjusamur. Enda var hann svo þreyttur eftir ferðina að hann svaf eiginlega samfellt í tvo sólarhringa. Ég held að hann væri alveg til í að búa í tjaldi.

Skór

Ég er loksins búin að fá aðaltískuskóna í dag! Við vorum í útilegu um helgina (meira um það seinna í annarri færslu) og þar spurði mamma hvort mig langaði í svona skó. Ójá heldur betur langaði mig í svona skó! Á leiðinni heim úr útilegunni (þegar ég var búin að sofna í bílnum og vakna aftur frekar úrill) fór ég að ræða við mömmu hvenær nákvæmlega við myndum fara að kaupa skóna. Helst vildi ég fara um leið og við kæmum heim, en mamma leiðinlega sagði að það væri ekki hægt af því þá yrði búið að loka búðinni. Ég orgaði smástund yfir því. Svo þagnaði ég, hugsaði mig um og stakk síðan upp á að við yrðum þá bara heima daginn eftir, þá gætum við farið í búðina um leið og yrði opnað. Og mamma, alltaf sami leiðindapúkinn, var nú ekki á því, hún sagðist endilega þurfa að fara í vinnuna. Ég skildi nú ekki alveg af hverju það væri svona nauðsynlegt, en mamma sagði að þegar maður væri fullorðinn yrði maður að fara í vinnuna sína, og annars myndi bara maðurinn í vinnunni skamma sig fyrir að fara úr vinnunni til að kaupa skó, það væri ekki hægt. Þá orgaði ég svolítið meira. Svo hugsaði ég mig um góða stund, og sagði síðan: "Mamma, ég veit. Segðu bara við manninn að ég sé veik!". Er ég ekki snjöll og útsmogin?

En mamma var nú ekki til í það, meiri fýlupúkinn sem hún er! Þá fór ég að reyna að semja um hvenær hún myndi sækja mig, ég vildi helst láta sækja mig klukkan ellefu og fara svo aftur í leikskólann þegar við værum búnar að kaupa skóna. En mamma vildi það ekki, hún gæti ekki farið úr vinnunni og það mætti heldur ekki trufla leikskólann. Svo á meðan við vorum í einn og hálfan tíma í halarófunni að komast inn í bæinn, var ég að orga og reyna að semja um hvenær ég yrði sótt í leikskólann. Það var allt í boði nema klukkan þrjú og klukkan fjögur, af því að það er sækjutími. Á endanum varð enginn samningur, nema daginn eftir var Guðmundur Steinn orðinn veikur, svo mamma þurfti hvort sem er að vera heima. Sigurður Pétur er náttúrulega í sumarfríi svo hann var líka heima, og þá fékk ég líka að vera heima og við fórum að kaupa skó á meðan Guðmundur Steinn svaf lúrinn sinn (pabbi var heima að vinna).

Dæmigert

Er þetta bara ég, eða eru öll fjögurra ára börn svona?

Ég: "Hvað er klukkan?"
Mamma: "Bíddu aðeins... (ca. 5 sekúndum seinna) hún er alveg að verða sex"
Ég: "Hver?"

Ofnæmi fyrir útlöndum

Gleymdi að segja ykkur að Guðmundur Steinn er kannski með svoleiðis, það er sko alveg hægt. Ég heyrði ömmu eitthvað gantast með þetta við mömmu og var fljót að sjá það að það gæti alveg verið og þá gæti hann kannski ekki komið með okkur til Þýskalands. Þá verður hann bara að vera hjá ömmu og afa á meðan. Já, pottarnir hafa sko eyru og eru ekki lengi að draga sínar ályktanir.

Sjálfstæð

Ég er orðin svo stór og dugleg, að í gær labbaði ég alein heim úr leikskólanum! Mamma kom á bílnum að sækja mig en ég vildi bara drífa mig labbandi. Það eru heldur engar götur á leiðinni, ég get verið á göngustíg og gangstétt alla leiðina, en þetta er samt dálítill spotti fyrir stutta fætur.

Nú, svo var ég hjá ömmu og afa í síðustu viku, mamma og pabbi voru með Guðmund Stein gubbandi í Róm. Það var sko miklu skemmtilegra hjá mér, ég fékk krítar og krossgátubók og kjól fyrir fermingarveislu sem ég fór í með ömmu og afa. Ég fór líka með þeim í heimsókn og fékk að vaka lengi lengi með unglingunum frænkum mínum og frændum sem voru að horfa á vídeó og borða snakk. Það var sko ekki leiðinlegt skal ég segja ykkur! Og ég fór á sundnámskeið, út að leika, fékk stóra flís í fótinn, tíndi orma og margt margt fleira. Þegar mamma og pabbi komu heim fékk ég svo stóra óskakúlu frá Róm, það er sko svona kúla með snjó inni í.

Núna er afi farinn í langt langt ferðalag, hann flaug til Calgary að sækja stóran bíl fyrir vinnuna sína. Svo er hann að leggja af stað að keyra bílinn alla leiðina þvert yfir Kanada. Og það er sko ekki lítið land!

Tsjúkkitt

Ég er orðin frískari, sem betur fer. Ég fékk sennilega bæði eyrnabólgu og gubbupest í einu, ég var ægilega lasin í einn dag en svo hresstist ég fljótt. Eins gott, því þá get ég hitt Silju frænku í keilu í dag og farið í afmæli til Teits og Bergs Mána á morgun. Svo er ég að fara í pössun til ömmu og afa á morgun, því mamma og pabbi og Guðmundur Steinn eru að fara til Rómar. Ég hlakka mikið til og er alltaf að skipuleggja hvað ég eigi að taka með mér og svona. En ef einhverjir innbrotsþjófar eru að lesa þetta þá þýðir sko ekkert að brjótast hérna inn á meðan við erum í burtu, því Gabríel verður heima að passa húsið! Leigjendurnir ætla nefnilega að vera svo góð að passa hann fyrir okkur á meðan.

Mesta grey í bænum

Ég á svoooo bágt. Í gærkvöldi fór ég að finna til í eyranu mínu og það bara versnaði og versnaði svo ég gat ekki sofnað. Á endanum samþykkti ég að fá smá verkjalyf og þá sofnaði ég loksins og svaf til eitt, en þá vaknaði ég aftur við eyrnaverkinn. Ég fékkst aftur til að taka smá meðal og náði að sofa til fjögur, en þá var ég aftur farin að finna svo mikið til og þá vildi ég alls ekki fá meira meðal. Svo ég grét og dottaði til skiptis til sex, þá bara fór ég fram, klæddi mig og fékk mér morgunmat og fór að horfa á mynd. Ég dottaði svo upprétt í stólnum yfir myndinni til átta og síðan barnatímanum. Þá var farið að leka úr eyranu mínu og það greinilega létti mikið á þrýstingnum því fyrir níu var ég lögst í rúmið mitt og steinsofnuð. Ég ætla svo að drífa mig til læknis á eftir þegar opnar á barnalæknavaktinni.

En í gær var ég ekki grey, þá fengum við Guðmundur Steinn að fara í pössun til ömmu og afa eftir leikskólann og Júlía var líka þar í pössun. Svo þið getið ímyndað ykkur hvort það hafi ekki verið fjör! Ég fékk meira að segja að fara aðeins út á línuskauta og afi hjálpaði mér að hanga á löppunum.

Um helgina var ég heldur ekki grey, á sunnudaginn var afmælisveisla hjá Hilku og Alla afa fyrir hann Magga. Þar fengum við afskaplega góðan mat að borða, og svo fórum við Sigurður út og lékum okkur á risastóru túni og svo á leikskólavelli við hliðina á húsinu. Það var svo frábærlega skemmtilegt að ég vildi helst drífa mig aftur þangað í heimsókn daginn eftir.

Og á laugardaginn fór ég að skoða Barnaskólann sem ég er að fara í þegar sumarið er búið. Þar var rosa skemmtilegt útisvæði, og inni var leikstofa og teppi með plássum, alveg eins og í leikskólanum mínum. Þetta verður örugglega mjög skemmtilegt. Já og ekki nóg með það, ég er sko að fara í tvo skóla í haust! Ég er nefnilega að fara að læra á selló í Suzuki skólanum. Það verður nú aldeilis spennandi. Og þá getur mamma rifjaði upp fiðlutaktana ;-)

Algjör snillingur

Í bílnum á leiðinni heim úr leikskólanum var ég að æfa mig að reikna:
11 + 11.. það eru... 21, nei 22.
Mamma: Já rétt, hvernig vissirðu það?
Ég: Bara af því að 11 er aðeins meira en 10 og þá eru það tveir í viðbót.

Og svo eitt gullkorn þar sem ég sat á klósettinu áðan (mamma fær orð í eyra þegar ég verð stærri og kemst að því að hún hefur skrifað þetta á netið!):
Svaka kúkur maður!

Myndir

Það eru komnar myndir frá því í nóvember og desember

Sumarið byrjað

Þá er fyrsti sumardagurinn kominn, ég var aldeilis ánægð með hann. Ég ætlaði að fara í pilsi og á peysunni niður í bæ en samþykkti á endanum að klæða mig aðeins betur, þó að sumarið væri komið. Við fórum öll fjölskyldan niður á Reykjavíkurhöfn og fórum þar í siglingu um sundin. Það var ótrúlega gaman og spennandi að sitja fremst á bátnum og hossast í öldunum. Svo fórum við í mat til ömmu og afa í Hjallabrekku og fengum sumargjafir og allt.

Svo voru nú páskarnir um daginn, það var aldeilis frábært fjör. Við fórum í Víðihlíð með ömmu og afa, Sunna og Maggi og Júlía komu líka í tvær nætur og Þórður í eina nótt. Það var heilmikið smíðað og málað og gerðir fínir veggir. Ég æfði mig endalaust að standa á höndum og að skrifa, lesa og reikna í skólabókunum sem ég fékk (Geitungurinn). Ég hljóp líka um alla móa með Gabríel, tíndi fjallagrös, og lék náttúrulega við Sigurð Pétur þegar hann kom. Við leituðum að páskaeggjum í skóginum (tré á stangli í brekkunni neðan við húsið) og ég fékk málsháttinn "Sælla er að gefa en þiggja" sem átti sérlega vel við þar sem ég var afskaplega upptekin af að setja allt nammið úr egginu í skál til að geta gefið öllum með mér. Þetta var afskaplega ljúft og skemmtilegt páskafrí.

Hrakningar

Í gær slapp Gabríel út og og hljóp út í hraun með Sigurð Pétur, Heiðar og mig á eftir sér. Ég var í fínu bleiku strigaskónum mínum og þegar ég kom í hraunið þá steig ég óvart í drullu og skórnir festust í drullunni. Svo ég fór úr skónum og hljóp strákana uppi. Þá hélt Sigurður að ég hefði hlaupið út á sokkunum og sagði mér að fara heim í skó. Ég snéri við og ætlaði að fara heim, en þá var ég orðin pínu villt og rataði ekki alveg heim. Þá fór ég smá að gráta. En svo fann pabbi mig sem betur fer, ráfandi um hraunið á sokkunum. Og Sigurður fann skóna mína, svo þetta bjargaðist allt.

Og á morgun kemur páskafríið. Ég er búin að vera að telja niður síðan fyrir helgi, ég hlakka ótrúlega mikið til. Mamma er búin að kaupa páskaegg handa mér og ég er svo spennt að fá að borða það. Reyndar borða ég ekkert af namminu sem er inni í því, en súkkulaðið er ágætt og máttur auglýsinganna mikill ;-)

Að lifa er að læra

Um helgina fórum við fjölskyldan í óvissubíltúr. Það var mjög spennandi, við villtumst um miklar ævintýraslóðir í þoku og rigningu, og svo fundum við allt í einu veitingahús (Hafið bláa) þar sem var kaffihlaðborð. Svo rötuðum við sem betur fer aftur heim. Á leiðinni að veitingahúsinu fannst mér vegurinn á einum stað aðeins of ævintýralegur, þegar ég horfði allt í einu bara beint niður í sjó úr glugganum mínum. Þá sagði ég, "ég vil ekki deyja, ég er svo ung!" Og svo bætti ég við, "ég er ekki búin að læra neitt!" Já, það er víst eins gott að halda sig við efnið, það er svo margt sem maður þarf að læra í þessu lífi. Svo í dag lærði ég um samhljóða og sérhljóða, og svo lærði ég líka að brjóta saman sokka. Ég var sko heima með mömmu og Guðmundi Steini, ég er lasin og pabbi í útlöndum, bara sama ástand og venjulega :-/ Ég er með andstyggilegar bakteríur í hálsinum (streptókokka) og þarf að taka ennþá andstyggilegra meðal til að drepa þær. En sem betur fer er meðalið líka mjög sterkt og ég er strax orðin svo hress að ég fæ að fara í leikskólann á morgun eftir að vera búin að taka meðal í tvo daga.

Guð í gamla daga

Mamma var að lesa fyrir mig Ævintýrið um Augastein þar sem er talað um hvernig fólk var fátækt í gamla daga og átti lítinn mat og það var svo dimmt því það var ekkert rafmagn. Þetta fannst mér merkilegt. Ég held að Guð í gamla daga hafi verið fastur á krossinum, eða kannski var hann svona gamall að hann gat ekki skapað ljós og rafmagn og mat handa fólkinu. Jámm, mamma hafði alla vega enga betri skýringu á reiðum höndum.

Eru að koma jól eða hvað? Hvað ætli Guð sé nú að bralla?

Já er nema von að maður spyrji, allt í einu var þykkt snjólag yfir öllu í morgun. Ég var alveg steinhissa á þessu.

Mamma er komin heim frá útlöndum, með fullt af fötum handa mér. Þar á meðal ótrúlega flott Hello Kitty föt sem mig kannski vantaði strangt til tekið ekki en voru bara svo krúttleg að hún varð að kaupa þau. Henni finnst líka svo fyndið að þetta skuli vera komið aftur í tísku því þetta var líka í tísku þegar hún var lítil stelpa.

Pabbi var ótrúlega góður við mig á meðan mamma var í burtu, gaf mér Ronju disk, Kinder egg og ýmislegt fleira. Við fórum líka í fjöruna með Gabríel, það var alveg ískalt en samt mjög gaman, við fundum skeljar og gamlan vinnuhjálm og ýmislegt merkilegt.

Riddaraprinsessa

Ég föndraði mér kórónu og brynju og sverð í leikskólanum

Fimleikadrottning

Framtíðarplön

Þegar ég eignast stelpu þá ætla ég að gefa henni nafnið Elísabet Margrét, og þegar ég eignast strák þá á hann að heita Andrés Ari.

Annars er það helst að frétta að ég er loksins orðin hitalaus, ég var heima alla síðustu viku með hósta og kommur en á morgun fæ ég loksins að fara aftur í leikskólann minn. Sem er eins gott því ég er orðin hundleið á húsinu okkar og mömmu minni. Ég fór til ömmu í pössun í smástund í dag og ég öskraði bara á mömmu þegar hún kom að sækja mig, ég vildi ekkert fara með henni. Seinni partinn í dag fékk ég svo smá heimsókn. Það var lítil stúlka sem býr fyrir aftan okkur og síðast þegar ég hitti hana var hún bara skríðandi um, en nú er hún orðin svo stór að hún kom trítlandi og spurði hvort hún mætti koma inn að leika. Ég hélt það nú og vildi helst ekkert að hún færi aftur, ætlaði bara að bjóða henni í mat og svona. En hún kemur örugglega aftur í heimsókn seinna og við eigum líka örugglega eftir að leika saman úti í garði þegar fer að vora.

Já og ekki má nú gleyma því að við systkinin fórum í pössun á laugardagskvöldið til Önnu-Lindar. Við vorum alveg til fyrirmyndar og okkur fannst rosa gaman að vera þar og leika við frændur mína þá Berg Mána og Teit. Mamma og pabbi komu svo um nóttina að sækja okkur, ég vaknaði víst alveg á leiðinni og lét lesa fyrir mig þegar við komum heim og eitthvað svona, en það eina sem ég mundi daginn eftir var þegar mamma hélt á mér og ég rann alltaf niður því hún var í svo sleipum kjól og ég í sleipum náttfötum.

Óskemmtilegur öskudagur

Það var eins gott að ég fór i búningaafmæli hjá Silju frænku minni í síðustu viku, ég er nefnilega lasin í dag og missti af öskuballinu í leikskólanum. Ég er samt ekkert mikið lasin, bara slöpp og með nokkrar kommur. Guðmundur Steinn er líka slappur, kvefaður og með hósta. Við erum orðin ósköp leið á þessu ástandi sem er búið að vera meira og minna frá áramótum, og erum farin að hlakka mikið til vorsins.

Rétt svar

Sunna frænka er snillingur, svarið er hraðahindrun. Hún fær kaffi og kökur þegar hún kemur fljúgandi á flugmiðanum sem hún vann í happdrætti um helgina! Og Lilja Eygerður fær gott klapp fyrir góða tillögu :-)

Gáta

Ég er mjög upptekin af umferðarskiltum þessa dagana og í bílnum er ég alltaf að spyrja mömmu hvað hin og þessi umferðarmerki þýða. Þá reyni ég að lýsa skiltunum fyrir henni en stundum fattar hún ekki hvaða skilti ég er að tala um. Og hér er þannig umferðarmerkis-gáta handa ykkur. Hvaða merki er það sem er þríhyrningur með gulu og mynd af hatti, ekki snjókallahatti heldur venjulegum hatti eins og menn eru með. Þeir sem geta án þess að kíkja í símaskrána fá klapp, og kaffi og meððí ef þeir koma í heimsókn :-)

Stöðutékk

• Mamma - orðin frísk
• Ég - aftur orðin lasin, með nokkrar kommur, hósta og leiða
• Pabbi - í útlöndum
• Sigurður Pétur - hjá mömmu sinni, ég fékk að hringja í hann alveg sjálf í gær
• Guðmundur Steinn - talar fyrir sig sjálfur
• Gabríel - hundleiður (bókstaflega) á að komast ekki út að labba, en Þórður hefur sem betur verið svo góður að viðra hann fyrir okkur

Skemmtilegir dagar

Það er búið að vera svo gaman hjá mér síðustu daga. Í fyrradag fékk ég að fara til læknis og í myndatöku. Það var tekin mynd af lungunum mínum, en ég gat ekki fengið að sjá myndina, hún er bara inni í einhverri tölvu. Það voru sem betur fer engar bakteríur á myndinni svo ég fæ bara púst en ekki meðal. Og í gær fékk ég að fara til tannlæknis, það er alltaf mjög spennandi. En það var samt ekki það skemmtilegasta, þegar mamma spurði mig í gærkvöldi hvað hefði verið skemmtilegast um daginn þá var það þegar amma Inga Rósa kom að passa mig á meðan mamma fór í búðina. Hún var að gera svona "hver á þessa tásu", það finnst mér alltaf svo gaman.

Aumingja mamma mín

Þegar við mamma komum heim eftir fimleikatímann minn í gær þá lagðist mamma bara beint upp í rúm. Ég spurði hvað hún væri að gera og hún sagðist vera veik. Ég horfði á hana í smástund og spurði svo, máttu ekki fara út? Nei, sagði hún. Þá var það útrætt, hún var greinilega mjög veik. Svo ég fór og föndraði handa henni umslag sem á stóð, pakki handa mömmu. Inni í því var svo miði sem á stóð, elsku besta mamma, húsið okkar er svo fallegt. Ég veit ekki hvaðan mér kom í hug að segja þetta um húsið, en mamma varð alla vega mjög glöð að fá svona fallegan pakka frá mér.

Kominn febrúar!

Það er meira hvað þessi mömmukona þykist hafa mikið að gera, má ekkert vera að því að skrifa fyrir mann. Ég verð bara að fara að gera þetta sjálf, ég er sko orðin mjög flink að skrifa. Amma og afi pössuðu okkur Guðmund Stein um daginn, þá skrifaði ég bréf til þeirra sem var svona: ama og avi ðö eru sghendileh og fn (amma og afi þau eru skemmtileg og fín). Ég er líka farin að skrifa ýmsa minnismiða, eins og hvað ég ætla að gefa vinkonum mínum í afmælisgjöf og svona. Ég skrifaði líka innkaupalista fyrir mömmu um daginn, svo hún myndi ekki gleyma að kaupa það sem mér fannst vanta. Það var: gúrka, flabröð, apelsínur, sítrónur, epli.

Ég er auðvitað orðin eldhress og laus við lungnabólguna. Það var þarsíðasta sunnudag sem ég var orðin frísk, þá fékk ég að fara í afmæli hjá vinkonu minni og svo aftur til skemmtilegu vinkonu hennar mömmu. Hún sagði að ég gæti örugglega orðið fimleikastjarna, ég var svo flink að fara í handahlaup og alls konar. Ég er líka hætt að vera í krílahóp og komin í G1. Mér finnst það mjög merkilegt, það er líka dálítið erfiðara en að vera í krílahóp. Mamma var að útskýra fyrir mér hvernig það yrði alltaf pínu erfiðara og erfiðara þegar maður færi í nýjan hóp í fimleikunum. Já, sagði ég, eins og í Mario! Það er sko uppáhaldstölvuleikurinn minn og þegar maður klárar borð þá kemst maður lengra og lengra og það verður erfiðara og erfiðara. Svo ég átti nú ekki erfitt með að skilja þetta.

Um síðustu helgi átti svo stóri bróðirinn minn afmæli, orðinn 10 ára! Strákarnir í bekknum hans komu hingað í afmæli og horfðu á mynd. Eftir myndina fóru sumir strákarnir að leika í mínu herbergi, það fannst mér heldur en ekki flott! Þeim fannst ótrúlega flott að ég skyldi eiga Action kall. Það er sko eldgamli Action kallinn hans Sigurðar Péturs :-) Grey Sigurður Pétur varð síðan lasinn á sunnudaginn og búinn að vera veikur alla vikuna. En gott að hann var hress í veislunni sinni og vonandi verður hann orðinn frískur fyrir fjölskylduveisluna á laugardaginn.

Skoppandi lungnabólgusjúklingur

Ég fékk að fylgja litla bróður til læknis í dag. Og af því að ég er búin að vera með leiðinda hósta í viku, og af því að mér finnst svo gaman hjá lækni, þá fékk ég líka smá skoðun. Ég var nú samt ekki mjög lasleg, dansandi um alla biðstofuna á meðan við biðum eftir að fara inn. En það kom í ljós að ég er komin með sýkingu í lungun og fæ meðal. Ég var líka búin að segja mömmu að ég þyrfti að fara til læknis! Ég segi það reyndar dálítið oft, mér finnst frábært fjör að fara til læknis. Og ég fæ semsagt að vera heima einhverja daga í viðbót, ég er búin að vera heima núna í viku að frátöldum einum degi þegar við mamma héldum að ég væri orðin frísk. Við erum búnar að gera ýmislegt skemmtilegt, í dag til dæmis bjuggum við til handa mér hálsfesti og armband úr seríosi og perlum. Svo bjuggum við líka til kórónu því ég vildi vera prinsessa. Ég ákvað síðan að skipta um nafn og tók mér nafnið Perla Lind Prinsessa, sem ég skrifaði á kórónuna.

Lasin í snjónum

Haldið þið að ég hafi ekki bara farið eins og fín frú í heimsókn út í bæ til vinkonu mömmu. Það var afskaplega skemmtilegt, þar var ótrúlega flott dót sem stóra stelpan hennar á, og svo fékk ég súkkulaðisnúð og kókómjólk. Ekki amalegt það!

Ég var því miður lasin heima alla helgina og Sigurður Pétur líka. Mamma bannaði mér líka að fara í leikskólann í gær, mér fannst það ömurlegt af henni >:-( Ég ætlaði ekkert að velja útisvæði og þá fannst mér að ég gæti bara alveg farið í leikskólann. En svo var ég orðin hitalaus í gær og mátti loksins fara í leikskólann aftur í dag. Sigurður Pétur mátti heldur ekki fara í skólann í gær, en hann var nú ekki eins mikið að skammast yfir því eins og ég. En okkur þótti báðum frekar leiðinlegt að geta ekki farið út að leika í öllum snjónum. Gabríel er hins vegar búinn að vera mjög duglegur að hoppa og skoppa og leika sér í snjónum, honum finnst það alveg frábærlega skemmtilegt. Pabbi fór með hann í labbitúr í fjöruna og hann stökk út á krapann í fjörunni þar sem hann sökk, svo pabbi þurfti að stökkva út í og bjarga honum.

Ég vissi ekki að það myndi verða svona brjálað hjá okkur!

Ég sá í fyrsta skipti áramótaflugeldana í gærkvöldi og vá hvað það var flott og brjálað! Ég var í veislu hjá ömmu og afa í Hjallabrekku með fullt af skemmtilegu fólki og við systkinin vorum sko í fullu fjöri! Það er að segja við Sigurður Pétur, Guðmundur Steinn var nú frekar rólegur og svaf alveg af sér áramótin. Ég sofnaði að vísu yfir áramótaskaupinu, en sem betur fer vaknaði ég aftur fyrir miðnættið, ég hefði örugglega orðið hundfúl ef ég hefði misst af aðal sprengjufjörinu. En ég var nú orðin ansi þreytt, ég var komin í náttfötin og afi hélt á mér út í bíl og pakkaði mér inn í teppi, það var nú notalegt.

Við óskum ykkur öllum gleðilegs árs og takk fyrir allt gamalt og gott.

Árið

Mamma mín vill útnefna sjálfa sig mann ársins fyrir að eignast svona ótrúlega flottan litla bróður handa mér. Hún er nefnilega mjög montin af því hvað hún var flink í að koma honum í heiminn, sérstaklega af því það gekk nú ekkert svo vel með mig á sínum tíma. Og hann er náttúrulega flottasti litli bróðir í heimi. Pabbi kemur síðan sterkur inn í annað sæti fyrir að vera svo skemmtilegur og góður og fara með okkur í ævintýraferðir í fjörunni. Og líka fyrir að smíða frábært baðherbergi handa okkur og íbúð á neðri hæðinni.

Í gærkvöldi var ég að dunda mér við að skrifa á meðan mamma og pabbi spiluðu við Sigurð Pétur. Ég skrifaði:
Þíaþ jólin eru indiseg jólin eu bstu jól í hmi (ég ruglast stundum pínu hvert ég er komin og gleymi stöku stöfum)
Svo skrifaði ég líka allt sem var í Ronju, ég fékk nefnilega að fara aftur að sjá Ronju í leikhúsinu í gær. Og það var:
Rasálvar, hultufólk, Ronja go Birkir, grátverkar (grádvergar), Matías, Sgalapétur (Skalla-Pétur), ridar (riddarar), Lovía (Lovísa), Borki, skóarorir (skógarnornir), Valdís og síðast en ekki síst, Hevedsskáin. Það er dálítið erfitt að skrifa Helvítisgjáin :-)

Guðmundur Steinn bloggar

Litli bróðir er loksins búinn að læra á bloggið, hann er hérna:
http://gudmundursteinn.blogspot.com

Jólin

Þá eru jólin loksins komin! Þessu lýsti ég nokkrum sinnum yfir á meðan við vorum að opna pakkana. Aðfangadagur var nú dálítið strembinn og mikið að gerast, afmælið hennar mömmu, möndlugrautur, jólabað, biðin eftir hátíðinni, spenningurinn yfir pökkunum og svo spennan yfir öllum fallegu og skemmtilegu gjöfunum. En þetta gekk nú stóráfallalaust og ég var afskaplega ánægð og glöð í lok dagsins, eins og við öll.

Á jóladag fórum við í jólaveislu til Önnu-Lindar frænku og hittum þar öll stóru frændsystkinin mín. Það var auðvitað brjálað fjör og við skemmtum okkur öll mjög vel. Guðmundur Steinn var ekki síst ánægður, hann fékk frostpinna í plasti að naga og fannst það æði, hann klæjar greinilega mikið í gómana litla greyið.

Á annan í jólum elduðu svo mamma og pabbi kalkún, það er hvorki meira né minna en níundi jólakalkúnninn sem þau elda saman! Þeim finnst það alveg ótrúlegt. Og þá kom Júlía sætaskott frænka mín og auðvitað afi og amma, Þórður og Sunna og Maggi. Mér fannst rosa gaman, sérstaklega þegar við horfðum á vídeómyndir af mér. Ég nennti sko ekkert að horfa á myndir af Guðmundi Steini, ég vildi bara hafa þær af mér.

Í gær fórum við svo á stóra fína jólaballið, ég var ekkert hrædd við jólasveinana og leiddi meira að segja einn þeirra! Og á morgun fer ég á Ronju ræningjadóttur og svo kemur gamlársdagur. Meira hvað það er margt skemmtilegt að gerast núna!

Jibbí

Pabbi er kominn heim og mikið er ég glöð. Ég hélt næstum því að hann kæmist ekki heim fyrir jólin.

Æsispennandi...

Pabbi minn er í Glasgow, hann þurfti að fara á fund í gær og átti að vera að fara í flugvélina núna, en það er búið að seinka fluginu um fjóra klukkutíma. Nú verður spennandi að sjá, kemst hann heim áður en næsta óveður kemur!

Jólasveinar

Hér er allt í fullu fjöri svona rétt fyrir jólin. Um síðustu helgi fórum við á jólaball í vinnunni hjá pabba og mömmu. Við systkinin vorum rosa fín í jólafötunum okkar og skemmtum okkur mjög vel. Kertasníkir kom og ætlaði að borða seríuna af jólatrénu. Hann var aldeilis fyndinn. Ég var ekkert hrædd við hann, mamma þurfti bara að halda á mér svo ég sæi betur.

Við fórum líka á jólahlaðborð í Húsdýragarðinum. Amma Inga Rósa og afi Guðmundur komu með og það var rosa gaman hjá okkur. Ég var dálítið smeyk við Grýlu, en vinur minn sem ég kynntist þarna passaði mig fyrir henni. Svo var líka jólasveinn og ég var eiginlega ekkert hrædd við hann. Eftir á löbbuðum við um og skoðuðum dýrin, og vorum svo heppin að hitta á bæði þegar hreindýrunum var gefið og selunum.

Stekkjarstaur kom svo í nótt og gaf mér skopparabolta í skóinn. Mér fannst ótrúlega spennandi að hann væri að koma, og átti pínu erfitt með að fara að sofa. Ég var líka búin að heyra í honum þegar ég var að fara að hleypa Gabríel út, þá heyrði ég svona eins og einhver væri að labba með staf. Þá varð ég nú frekar skelkuð. En ég þorði alveg að kíkja ein í skóinn, mamma og pabbi þurftu ekkert að koma með mér eins og þegar ég var lítil.

Pínu lasin

Í dag er ég pínu lasin og er heima með mömmu og Guðmundi Steini. Ég var með dálítinn hita í morgun, en ég er samt ágætlega hress og áðan sagði ég mömmu að ég ætlaði bara að hoppa úr mér hitann. Svo gormaðist ég um allt eins og lítil kengúra. Ég þurfti auðvitað ekki að fara í skólaföt svo ég notaði tækifærið og klæddi mig upp á, fór í kjól og sokkabuxur, setti blýant á augabrúnirnar, fékk mér kinnalit og gloss, og perlufesti um hálsinn. Algjör pæja. Svo bökuðum við mamma smákökur með rúsínum í, okkur pabba finnast þær ótrúlega góðar en ekki mömmu því hún borðar ekki rúsínur nema það sé súkkulaði utan um þær.

Áðan spurði ég mömmu, hvað er beita? Mamma reyndi að útskýra það, það er eitthvað sem maður setur á öngulinn þegar maður er að veiða, eins og til dæmis orm. Já, sagði ég, eða fugl!

Desember

Jæja, þá er loksins kominn desember. Í gærmorgun sagði pabbi, nú er kominn desember, þá koma jólin. Nei, sagði ég, það eru ekki að koma jól, það er enginn snjór. Svo hugsaði ég mig aðeins um og sagði svo, það verða rauð jól! En svo er nú allt hvítt núna, svo það er aldrei að vita nema verði hvít jól. Ég fékk loksins súkkulaðidagatal, í fyrsta skipti. Maður á að finna töluna sem er og svo fær maður súkkulaði með engu inni í. Það er nú eitthvað fyrir mig!

Í dag á hún amma Inga Rósa afmæli. Til hamingju með daginn amma mín, ég hlakka mikið til að koma til þín á eftir. Og það er nóg að gera í afmælum þessa dagana því Anna-Lind frænka mín og Darri eru bæði nýbúin að eiga afmæli. Hamingjuóskir til ykkar og við hlökkum líka mikið til að koma loksins í heimsókn á morgun. Það er nóg um að vera hjá okkur um helgina, því fyrir utan tvær afmælisveislur þá er Guðmundur Steinn að fara á sundnámskeið, mamma í jóga, Sigurður Pétur í fótbolta og karate og ég í fimleika. Það er síðasta skiptið í fimleikunum og foreldrarnir eiga að koma í íþróttafötum og gera æfingarnar með okkur. Ég bíð sko spennt eftir því að láta mömmu fara í kollhnísa og alls konar og kenna henni allt sem á að gera. Pabbi ætlar líka að koma með og taka myndir af okkur mömmu.

Í fyrradag fórum við mamma og Guðmundur Steinn að heimsækja dagforeldrana mína, þau Katrínu og Hilmar. Það var svo gaman og ég var búin að hlakka lengi til að fara til þeirra, ég teiknaði mynd í leikskólanum og pakkaði inn handa þeim. Okkur mömmu þykir ósköp vænt um þau, ég var alltaf svo glöð og ánægð hjá þeim. Þau eru komin í nýtt hús og eru með ótrúlega fína aðstöðu fyrir litlu börnin. En Guðmundur Steinn verður því miður ekki svo heppinn að vera hjá þeim, því hún Katrín er með lítinn strák í maganum sem á einmitt að fæðast í vor þegar Guðmundur Steinn þarf að fara í pössun. Við samgleðjumst þeim samt auðvitað, og líka litla stráknum sem fær svona góða mömmu og pabba :-)

Og meira

Októbermyndirnar eru líka komnar

Septembermyndir

eru komnar hér

Stórafmæli

Í dag er hún Sunna frænka mín hvorki meira né minna en 30 ára! Til hamingju með daginn Sunna mín, ég vildi að ég gæti komið að heimsækja þig alein, mamma á að vera heima að passa Guðmund Stein á meðan.

Og hann afi minn Jón er nýorðinn 75 ára, til hamingju með það afi minn! Við fórum í veislu til hans á sunnudaginn. Ég var pínu ringluð með það hvar veislan ætti að vera, ég hélt að við myndum kannski fara til Akureyrar en mamma sagði mér að veislan yrði í Reykjavík. Svo ég var voða spennt að fara til Reykjavíkur í veislu og var alla leiðina í gegnum Garðabæ og Kópavog að spyrja hvort við værum núna komin til Reykjavíkur. Það var ótrúlega gaman í veislunni, ég var allan tímann að lita og spila við Silju frænku mína og líka fleiri krakka sem ég þekki ekki. Ég var ekkert feimin, ég sagði þeim hvað ég er gömul og hvað leikskólinn minn heitir.

Í gær var sundnámskeið og eftir námskeiðið átti ég nokkur gullkorn:
Mamma: Við verðum að drífa okkur svo pabbi komist á fundinn.
Rósa: Hvað gerist ef hann kemst ekki á fundinn? Missir hann vinnuna?
-
Rósa (við tvöfaldar útidyrnar í íþróttahúsinu): Þarna er önnur hurð. Er þetta aukahurð? Ef hin fýkur af?
-
Rósa: Hvað varstu að segja við manninn?
Mamma: Ég var að segja að það væru menn niðri og þar gæti hann kannski fengið að hringja.
Rósa: Hvað heldurðu að þeir segi við hann? Heldurðu að þeir segi, "þú ert svikari!"

Allir hressir

Já, hvað gerðist. Það var nú bara þannig að ég var að hlaupa með vinkonu minni og ég var að leiða hana með báðum höndum fyrir aftan bak. Svo datt ég og þá gat ég ekkert borið fyrir mig hendurnar svo ég stakkst bara beint á ennið. En kúlan er búin að hjaðna mikið og ég er orðin eldhress aftur, sem betur fer.

Gabríel er líka eldhress, hann var voða mikið grey því hann var í "klippingu" hjá dýralækninum. En hann er alveg búinn að jafna sig á því, honum finnst bara dálítið leiðinlegt að þurfa að vera með skerm um hausinn.

Lítill kiðlingur

Nú er ég alveg eins og einhyrndur kiðlingur, með stóran hnýfil út úr enninu. Mamma kom og sótti mig í leikskólann og sat með mig í fanginu, og pabbi keypti verðlaun handa mér. Ég var algjört grey, en sem betur fer er ég öll að hressast núna.

Brabra

Ég var að mála mynd og ætlaði að biðja mömmu að hjálpa mér, svo ég spurði hana hvort hún kynni að mála önd. Mamma heyrði eitthvað ekki nógu vel í mér og spurði til að vera viss, "önd, svona sem segir brabra?". "Neinei", sagði ég, "bara þegjandi önd".

Meiri hundasögur

Aftur er komið óveður, og í nótt fauk stórt rusl inn í garðinn okkar. Gabríel, varðhundurinn mikli, áttaði sig strax á því að þarna var illskeytt glæparusl á ferð og gelti sem óður væri þangað til mamma gafst upp á honum og lét hann sofa inni í herbergi hjá sér. Í morgun hringdi svo síminn hennar mömmu. Hún skildi ekkert hvar síminn var, en fann hann á endanum inni í hundabúrinu! Það sást samt ekkert á honum, Gabríel hafði ekkert nagað hann og hefur örugglega bara ætlað að hringja í tíkina hinum megin við götuna sem hann er svo ægilega skotinn í þessa dagana.

Ekki hundi út sigandi

Nei, það er bókstaflega ekki hundi út sigandi, alla vega ekki okkar hundi. Hann er voða órólegur yfir þessu óveðri greyið en sem betur fer vaknaði hann þegar pabbi fór á flugvöllinn í nótt og fór þá út í garð. Svo hann ætti ekki að þurfa að pissa í sófann alveg strax (Gabríel þá auðvitað, ekki pabbi). Pabbi er líka grey, hann hangir úti á flugvelli og bíður eftir að það verði flogið, sem verður ábyggilega ekki fyrr en einhvern tímann seint í dag. En það er alltaf í athugun eftir klukkutíma og svo annan og annan, svo hann neyðist til að hanga þarna og bíða.

Í gær var ég í afmæli hjá vinkonu minni af leikskólanum, og Lína langsokkur kom í afmælið! Það var sko ekkert smá flott, hún söng og dansaði með okkur og svo ætlaði hún að stinga skeið beint í afmæliskökuna. En við kenndum henni hvernig maður á að borða afmælisköku og þá gerði hún alveg eins og við.

Frí og fjör

Í síðustu viku var vetrarfrí í skólanum hjá Sigurði Pétri, svo ég fékk aukafrí í leikskólanum mínum og við fórum að heimsækja ömmu og afa á Akureyri. Það er náttúrulega ekki að spyrja að því, alltaf jafn notalegt að koma þangað og margt skemmtilegt að gera. Amma fór með okkur í jólahúsið og út í garð að búa til snjókarl, og afi sýndi okkur safnið sitt (Iðnaðarsafnið). Pabbi fór með okkur í bíó og svo vorum við systkinin rosa dugleg að leika saman úti og inni. Guðmundur Steinn var eins og engill, svaf báðar leiðir í bílnum og var ekki með neitt vesen eins og ég þegar ég fór í fyrsta skipti að heimsækja ömmu og afa á Akureyri. Þá var ég álíka gömul og hann er núna, og þá kúkaði ég svo agalega á Brú í Hrútafirði að ég þurfti að fá ný föt frá toppi til táar. Og það var svo kalt á klósettinu þar sem skiptiborðið var að ég orgaði hástöfum allan tímann. Það var nú meira.

Gabríel fór á hundahótel. Það gekk bara vel en hann var nú svolítið skrítinn fyrst eftir að hann kom aftur heim. Það var eins og hann væri búinn að týna gleðinni sinni, en hann fann hana nú fljótt aftur sem betur fer.

Ég er byrjuð á sundnámskeiði tvisvar í viku, rosa skemmtilegt. Svo er ég líka á dansnámskeiði í leikskólanum, ég er alveg á fullu að læra eitthvað nýtt þessa dagana. Ég er líka alltaf að æfa mig að lesa og skrifa, á Akureyri bjó ég til kort og skrifaði á það "Tyl leikskólynn Ásar". Svo skrifaði ég líka alla skólana sem ég fer í, "Barnaskólynn", "Sjálandskóly" og "Garðaskóly".

Myndirnar eru komnar í mun betra lag en áður, svo ef einhverjir ætluðu að skoða skírnarmyndirnar en höfðu ekki þolinmæði til þess, þá er það hægt núna.

Ekkert að gerast?

Jú, hér er allt búið að vera í fullum gangi að ganga frá íbúð á neðri hæðinni hjá okkur. Leigjendurnir flytja væntanlega inn um helgina. Svo er litli bróðir búinn að fá klippingu, mömmu og pabba fannst hann svo asnalegur með langar hárlufsur innan um skallablettina að þau snoðuðu hann bara. Það gekk að vísu ekkert stórkostlega vel, hann er aðeins minna asnalegur en ekki mikið.

Ég er á fullu í félagslífinu þessa dagana, mesta sportið er að fá að fara saman heim af leikskólanum með vinkonum mínum. Það eru líka nokkrar vinkonur hérna stutt frá sem ég get labbað til og spurt eftir þeim. Þetta er rosalega spennandi allt saman og ég vil helst alltaf vera að heimsækja einhverja og fá einhverja í heimsókn.

En á ég að segja ykkur eitt. Risaeðlurnar voru á jörðinni fyrir hundrað árum og þær eyðilögðu allt, meira að segja bílana. En nú er búið að laga allt á jörðinni. Svona veit ég nú margt. Ég veit líka hvernig regnbogi verður til, það verður að vera rigning og sól og þá kemur regnbogi. Rigningin kemur úr skýjunum og þegar vatnið gufar upp þá koma skýin.

Lengi er von á einum

Haldið þið að ég sé ekki bara komin með eyrnabólgu! Það er nú orðið langt síðan síðast, ætli það hafi ekki bara verið síðasta haust þegar ég fékk sýkingu undan rörinu sem átti að vera farið. Mér finnst alveg frábært að fá eyrnabólgu, þá fæ ég að fara til læknis og taka meðal. Það er bara eitt af því skemmtilegasta sem ég veit. Að vísu fannst mér ekkert gaman í gærkvöldi að vera illt í eyranu, það var svolítið erfitt að sofna, en svo fékk ég verkjalyf og þá leið mér betur.

Ég er að fara að halda aðra afmælisveislu um helgina, um daginn var það fyrir leikskólavinkonur mínar og núna verður fyrir frænkur mínar og frændur, og vini mína eins og ömmu og afa og svoleiðis. Ég hélt að þá yrði ég fimm ára, en svo útskýrði mamma fyrir mér að ég verð víst áfram fjögurra ára.

Ég kann að skrifa

Daginn áður en ég varð fjögurra ára skrifaði ég "Gabríel kúkar í pabba rúm" og "Rósa pissar í móa", alveg sjálf. Síðan er ég líka búin að búa til kort handa vinkonu minni og skrifa á það "Kort tyl Ylfu Sólar frá Rósu".

Ég er líka búin að fá nýtt prinsessurúm og í nótt svaf ég 12 tíma án þess að rumska. Þetta er allt annað að eiga svona alvöru fínt rúm með góðri dýnu. Mamma og pabbi eru líka mjög ánægð með nýja rúmið, ég verð nefnilega svo úrill og önugsnúin þegar ég sef ekki nóg. Guðmundur Steinn var líka purrka í nótt, hann svaf samfellt í 7 tíma! Mamma var nú heldur en ekki kát með það.

Af honum er það annars helst að frétta að hann var í 6 vikna skoðun og er orðinn 6.360 grömm og 62 sentimetrar. Hann er semsagt búinn að stækka um einn sentimetra á viku frá því hann fæddist.

Myndirnar

Myndirnar eru orðnar svo ægilega hægvirkar af einhverjum ástæðum, það stendur vonandi til bóta á næstunni.

Ég á afmæli í dag!

Jibbí skibbí, í dag er ég fjögurra ára! Í gær þegar ég vaknaði var pakkaleit, mamma og pabbi földu pakkana mína og ég leitaði svo að þeim. Svo var ótrúlega fín veisla fyrir vinkonur mínar á leikskólanum, við fengum kökur og fórum í alls kyns leiki. Það var pínu erfitt að vera svona spennt, sérstaklega var svolítið erfitt að bíða í fyrradag, en þetta tókst allt saman mjög vel og ég var afskaplega ánægð með veisluna.

Pabbi fór til útlanda í nótt svo mamma og Guðmundur Steinn fóru með mig í leikskólann. Ég fékk að fara með Guðmund Stein inn og sýna stúlkunum hann, ég var nú heldur en ekki upp með mér að eiga svona fínan bróður og vera svo líka afmælissstúlka með mynd af mér uppi á töflunni. Ég fæ að baka köku í leikskólanum í dag og það verður sungið fyrir mig. Það er sko gaman að eiga afmæli.

Þar sem pabbi er í útlöndum þá verður mamma ein heima alla þessa viku með afmælisafganga inni í ísskáp, allir velkomnir í heimsókn að bjarga mömmu frá að háma þá í sig ein.

Og myndir úr skírninni hans Guðmundar Steins eru komnar hér.

Guðmundur Steinn

Þá er búið að skíra litla bróður, séra Guðjón frændi okkar kom hérna heim og það var ósköp ljúf og notaleg athöfn. Afi Guðmundur og Þórður frændi spiluðu á gítar og allir sungu skírnarsálminn og Leiddu mína litlu hendi, og Guðmundur Steinn litli bróðir brosti út að eyrum og hjalaði svo hann var greinilega ánægður. Ég er líka mjög ánægð með nafnið hans og er alltaf að nota það.

Svo fæ ég veislu um næstu helgi því ég verð fjögurra ára á mánudaginn. Ég ætla að bjóða vinkonum mínum af leikskólanum um helgina og svo ætlum við að bjóða frændum mínum og frænkum seinna. Verst að þá kemst hún Júlía Jökulrós ekki, því hún er flutt til útlanda. Mikið eigum við nú eftir að sakna hennar :-(

Partý og veislur

Amma mín var svo góð að bjóða mér í grillpartý í götunni hennar. Þar var fullt af krökkum og ég fékk pylsu, litabók, liti og krítar. Ég skemmti mér ótrúlega vel, Sigurður Pétur var sko algjör kjáni að vilja ekki koma með. Svo er ég að fara í afmælisveislu hjá Júlíu litlu frænku minni sem er hvorki meira né minna en eins árs í dag, til hamingju með það Júlía Jökulrós! Það er aldeilis nóg af veislum þessa dagana, því um næstu helgi á svo að skíra litla bróður minn. Hann er búinn að fá að fara út í vagn í labbitúr og líka búinn að sofa úti, þó hann sé bara tveggja vikna. Hann er svo stór og duglegur, og það er búið að vera svo gott veður að hann má það alveg.

Meistari slönguspilsins

Það er sko ég, ég mala mömmu alltaf í slönguspili. Ég er ótrúlega heppin með að lenda á stóra stiganum en mamma fer alltaf bara hring eftir hring í neðstu slönguna. Það finnst mér sko ótrúlega fyndið.

Af litla bróður er allt gott að frétta, hann er voða rólegur og góður sem er mjög gott því þá geta mamma og pabbi hugsað meira um mig. Ég er líka mjög dugleg að vera stóra systir, ég er góð að fara að sofa og dugleg að drífa mig í leikskólann á morgnana og kem svo hress og kát heim. Þá fer ég í slönguspil við mömmu eða út að labba með pabba og Gabríel, hlusta á sögur í herberginu mínu og mála eða lita, eða að lesa bók með pabba eða mömmu. Það er alltaf eitthvað skemmtilegt að gera hjá mér.

Mamma er líka hress og kát, hún getur alveg sofið fullt og er ekki næstum því eins þreytt og þegar litli bróðir var í bumbunni. Pabbi er líka heima að passa hana og litla bróður og Gabríel. Hann fer alltaf með mig í leikskólann á morgnana og sækir mig oftast líka. Stundum fer hann labbandi með Gabríel og ég fer á hlaupahjólinu, það finnst mér skemmtilegast.

Nokkrar myndir eru svo komnar í viðbót af krúttapúttinu.

Litli bróðir stækkar

Litli bróðir er ótrúlega duglegur að sofa, drekka og stækka. Í 5 daga skoðuninni var hann kominn vel yfir fæðingarþyngdina sína. Svo þeir sem vilja sjá hann á meðan hann er ennþá lítill eru velkomnir í heimsókn, hringið bara á undan ykkur svo mamma og pabbi verði nú örugglega komin á fætur :-) Verst finnst okkur hvað afi Guðmundur er langt í burtu, hann var nýfarin að keyra rútu þegar litli bróðir fæddist. Við söknum hans og hlökkum til að hann komist að skoða litla afastrákinn. Amma Inga Rósa sótti mig í leikskólann í gær og fór með mig í Húsdýragarðinn. Þar lentum við í brjáluðu óveðri og þurftum að flýja inn. En það var samt ótrúlega gaman, við sáum refi og meira að segja einn yrðling. Í morgun spurði ég mömmu hvort amma myndi ekki sækja mig aftur í leikskólann, hún er miklu skemmtilegri en mamma og pabbi sem eru bara alltaf í leti.

Stóra systir

Svona gerist þegar maður hoppar á hurð

Litli bróðir

Þetta er hann litli bróðir minn. Hann er ótrúlega rólegur og góður, sefur bara og drekkur og er algjört krútt. Þegar hann var loksins rekinn af stað var hann enga stund í heiminn, bara rétt um 3 tíma frá því mamma fékk drippið. Það fannst henni nú ekki mikið mál, þó hún skildi ekkert í því rétt á meðan hvernig henni hefði dottið í hug að gera þetta aftur. Fleiri myndir eru svo hér.

Örblogg

sætur, ég er búin að fara að skoða hann á sjúkrahúsinu

Örbloggfærslu sendi ég

Powered by Hexia

Örblogg

Litli bróðir fæddist í dag, hann er 17 merkur og 56 sm. og ótrúlega

Örbloggfærslu sendi ég

Powered by Hexia

Allt í plati?

Það bólar ekkert á þessu litla barni, ætli mamma sé ekki bara búin að borða svona mikið nammi og þess vegna er hún svona feit og löt. Í morgun fórum við í leikskólahópnum mínum í göngutúr og hittum þá mömmu og Gabríel sem voru líka í smá morgungöngu. Það fannst mér nú sniðugt, þá gat ég gefið henni risastóra fífilinn sem ég hafði fundið. Ég vildi náttúrulega helst bara fara með þeim heim, en svo sættist ég nú alveg á að það væri ekki í boði. Enda er miklu skemmtilegra að vera í leikskólanum heldur en að hanga heima.

P.s. frá mömmu - það er í alvöru barn þarna, alveg satt! Það fær séns í einn dag í viðbót, annars verður gangsett á fimmtudagsmorguninn.

Ekkert litla barn

Já, mamma var líka búin að átta sig á því að þessi "Loksins" fyrirsögn gæti misskilist :-) En neinei, litla barnið situr sem fastast í bumbunni og ætlar ekkert að koma út. Nema kannski helst bara beint út um naflann eða eitthvað, það er voða mikið að hnoðast og sparka og vesenast þessa dagana. Mamma mín er ekkert kát með þetta lengur, aðallega af því það eru alltaf allir að tala um gangsetningu og hún vill það ekki. Annars líður henni ljómandi vel, fyrir utan bara að hún er náttúrulega þreytt og alltaf liggjandi í leti. Ég er líka alltaf að segja henni að vera ekki svona í leti, mér finnst hún sko algjör haugur stundum. En þá er nú líka gott að vera byrjuð aftur í leikskólanum og geta verið þar í fjöri með vinkonunum.

Loksins

Eins og það er gaman að fara í sumarfrí, þá er eiginlega ennþá skemmtilegra að fara aftur í leikskólann. Ég er búin að vera að vakna seinna og seinna á morgnana, í gærmorgun vaknaði ég til dæmis klukkan hálftíu, skreið þá fram í sófa og kúrði undir sæng fyrir framan teiknimyndir. En í morgun stóð ég fullklædd og tilbúin við rúmið hjá mömmu klukkan átta og sagði, eigum við ekki bara að drífa okkur! Og það var sko ekki amalegt að mæta í leikskólann og fá þvílíku knúsin og hlýju móttökurnar, ég held að ég sé með bestu leikskólakennara í heimi.

Lestraræfingar

Mér finnst rosalega gaman að æfa mig að lesa, en ég nenni ekkert að lesa einhverjar leiðinlegar lestrarbækur um Óla og Ásu og ís og eitthvað. Skemmtilegast finnst mér þegar mamma og pabbi (aðallega pabbi, hann er miklu flinkari í því en mamma) skrifa eitthvað fyndið handa mér, eins og til dæmis "Rósa pissar í móa" og "Gabríel kúkar í rúmið hans pabba".

Engar fréttir

Það er ekkert að gerast, litla barnið hefur það bara notalegt í bumbunni og er ekkert að gera sig líklegt til að koma sér út. Ég byrja aftur í leikskólanum á morgun og hlakka mikið til, það verður svo gaman að hitta allar stúlkurnar aftur og fara aftur að hafa fasta reglu á dögunum.

Og afi Guðmundur á afmæli í dag, til hamingju með daginn afi minn!

Mamma feitabolla

Komin 40 vikur í dag

Meiri myndir

Þetta er kannski hreiðurgerðin hjá mömmu að lýsa sér svona ;-) Hún er alla vega búin að setja inn hvorki meira né minna en þrjú ný myndaalbúm! Það eru myndir úr jeppaferðinni sem við fórum í október með vinnunni þeirra pabba og mömmu, nokkrar leikskólamyndir frá því síðasta haust og fram að jólum og svo desembermyndir.

Myndir

Í tilefni þess að það er loksins búið að tengja öll tækin aftur eftir framkvæmdirnar og þar með myndirnar komnar aftur á netið, þá er mamma búin að setja inn nýtt albúm. Og það er hvorki meira né minna en, tandara, myndir frá afmælinu mínu, ekki einu sinni orðnar ársgamlar. Svo er aldrei að vita nema mamma dundi við að setja inn fleiri myndir á meðan hún bíður eftir litla barninu.

Pomms

Í nótt skreið ég upp í til mömmu, en af því hún er með svo feita bumbu þá datt ég fram úr rúminu og meiddi mig heilmikið í vörinni. Ég grét og grét en vaknaði samt aldrei almennilega, og í morgun mundi ég ekkert eftir þessu. Þannig að þegar ég vaknaði og sá sárið þá var ég alveg viss um að þetta hefði komið þegar ég renndi mér niður tröppur á snjóþotu um páskana, þó að bróðir minn hefði sagt mér að gera það ekki. Svo ég horfði á sárið í speglinum og sagði, svona gerist þegar maður hlustar ekki á bróður sinn!

Sumar og sól

Loksins kom svolítið gott veður og ég fékk að fara í tívolíið. Ég skemmti mér alveg ótrúlega vel, fékk að fara í rússíbana og allt, alveg brjálað. Í gær fékk ég svo að fara á gæsluvöll með vinkonu minni úr leikskólanum. Það var líka rosalega gaman, ég fór með nesti og svo vorum við að leika okkur í næstum því fjóra klukkutíma. Við mamma vildum bara að við hefðum vitað af þessum gæsluvelli fyrr.

Og nú styttist í litla barnið. Mamma er orðin svolítið þreytt í bumbunni og fótunum (vægir fyrirvaraverkir og frekar slæm í grindinni) en annars líður henni bara vel. Baðherbergið er svo gott sem tilbúið og húsið að komast í samt lag aftur, svo það er allt á góðri leið með að verða tilbúið. Það er meira að segja búið að kaupa bílstól og bleyjur og gjöf frá mér handa litla barninu. Vonandi bíður það samt aðeins lengur í bumbunni, því við ætlum að reyna að skreppa í Víðihlíð í nokkra daga.

Einasti

Þegar maður er að telja, til dæmis daga þangað til eitthvað gerist, þá kemur fyrst einasti, svo tveðji, svo þriðji og fjórði.

Í dag fór ég í Byko með mömmu og fór í leikvæmið á meðan hún keypti eitthvað smíðadót sem pabba vantaði. Ég var voða glöð að hitta krakka til að leika við, mér er búið að leiðast frekar mikið um helgina. Ég eignaðist meira að segja vin, hann gaf mér þvottaklemmu sem ég mátti eiga. Ótrúlega flott gjöf!

Baðið

Þarna er baðið komið á sinn stað. Ég er búin að fá að fara í það og synda um í því, það er sko alveg frábært.

Og nú er ég komin í sumarfrí. Ég er bara heima með mömmu, við erum búnar að fara á kaffihús og í sund og bráðum förum við vonandi í Húsdýragarðinn. Mig langar líka ótrúlega að fara í tívolíið í Smáralind, þó mamma sé eitthvað lítið spennt fyrir því. Svo kemur Rakel og leikur við mig eftir hádegið svo mamma geti lagt sig. Hún er orðin svolítið þreytt í bumbunni, enda er litla barnið alveg að verða tilbúið. Vonandi kemst pabbi líka í frí bráðum, hann er voða mikið að vinna núna alltaf með einhverjum útlendingum og er ekkert frí búinn að fá í sumar.

Á síðustu metrunum

Svona er mamma mín orðin feit (35 vikur)



og svona er baðherbergið aaaaalveg að verða tilbúið