laugardagur, september 19, 2009

Sjö ára


Það var svo mikið að gera í afmælishaldi hjá mér í gær að ég mátti bara ekkert vera að því að segja frá því! Ég byrjaði á því að vakna við afmælissöng og fékk að opna einn pakka. Og í honum reyndist vera það sem ég óskaði mér allra mest, miðar á Söngvaseið. Og það meira að segja á sýningu sama dag og á fremsta bekk! Það var reyndar þýddi að ég þurfti að fara snemma úr afmælisveislunni sem ég var búin að bjóða öllum í bekknum í, en það var nú allt í lagi.

Ég fór svo í skólann og átti afskaplega góðan dag þar, allar vinkonur mínar kepptust um að fá að sitja hjá mér og knúsa mig og gefa mér föndraðar afmælisgjafir, það er sko ekki amalegt að eiga svona góðar vinkonur. Mamma sótti mig svo snemma og við fórum að undirbúa veisluna. Í veislunni var ratleikur, regnbogakökur og rice crispies nammiskálar, og svo horfðum við á Pétur Pan í bíóinu. Og ég fór síðan fyrst af öllum úr afmælinu til að fara í leikhúsið. Mér fannst alveg jafn skemmtilegt og þegar ég fór með ömmu síðasta vor, ég var sko alveg síðan þá búin að óska þess að fá miða á Söngvaseið í afmælisgjöf.

Þetta var semsagt alveg frábær afmælisdagur og ég var ótrúlega ánægð með hann!

mánudagur, september 07, 2009

Tannlaus


Svona er ég nú flott núna :-) Ég er byrjuð aftur í skólanum eftir aldeilis fínt sumarfrí, við rúntuðum fram og aftur um landið í Hummernum í fjórar vikur og gerðum margt margt skemmtilegt. Ég fékk líka að fara á skátanámskeið og það var algjört æði, ég fór í sund í Nauthólsvík, hjólandi að Vífilsstaðavatni og þar á kajak, og meira að segja í útilegu yfir nótt. Svo fannst mér líka mjög gaman að mæta aftur í skólann og hitta allar vinkonurnar, og heldur betur spennandi að fá heimaverkefni! Og nú styttist bara í afmælið mitt. Ég veit alveg hvað mig langar mest af öllu í í afmælisgjöf, það er nefnilega miðar á Söngvaseið. Ég fékk að fara með ömmu síðasta vor og alveg síðan þá hef ég beðið eftir því að afmælið mitt komi og óskað mér þess mest af öllu í afmælisgjöf að fá að fara aftur.

þriðjudagur, maí 26, 2009

Talandi dír og hlutir

Ég hef nú ekki mikið komist að til að skrifa undanfarið, það snýst allt hérna um þennan fótbrotna bróður minn. Eins og mér líði ekki líka stundum illa! Svo er hann ótrúlega nískur. En ég er samt eiginlega alltaf mjög góð við hann, dugleg að leika við hann og svoleiðis. Svo var ég nú svo heppin að fá að fara með honum á leikstofuna á spítalanum og hitta Hring ísbjörn og föndra mósaíkmyndir og fleira skemmtilegt, svo þetta hefur nú líka haft sína kosti. En nú er hann kominn heim og byrjaður í aðlögun aftur í leikskólanum. Annars ætlaði ég alls ekkert að skrifa um hann, heldur ætlaði ég að segja ykkur frá því að ég er ótrúlega spennt því ég er að fara í vorferð með skólanum mínum á morgun. Við förum á Eldborg á Snæfellsnesi og verðum í tvær nætur. Ég fór líka í svona ferð í fyrra og það var alveg frábært, þá fórum við í Vatnaskóg.

Svo ætlaði ég líka að deila með ykkur sögu sem ég skrifaði í skólanum, hún er orðrétt svona:

Talandi dír og hlutir
Fór ég úti í götu hitti talandi fötu fór hún eins og í lötu.
Dægin eftir sá ég belju á svelli
Geit pakkar vasa inn
Beljan sagði þetta er skautadans!
Geitin sagði ég er að pakkinn vasa!

sunnudagur, apríl 12, 2009

Gleðilega páska

Það er búið að vera geggjað fjör hjá okkur í páskafríi á Akureyri! Ég er búin að vera rosa dugleg á skíðum og renna mér um allt í fjallinu, mest með Silju og Önnu Margréti. Í dag hitti ég svo hana Kristínu Kolku vinkonu mína í fjallinu og við renndum okkur um allt með mömmu hennar. Svo fékk ég að fara með henni í matarboð langt fram á kvöld, þvílíkt fjör og partístand á manni! :-) Ég er líka búin að fara í sund og búin að leika mikið bæði úti og inni með bræðrum mínum og frændsystkinum, við fengum að hjálpa strákunum að búa til ótrúlega flott snjóhús og erum búin að brasa ýmislegt. Það er samt stundum dálítið erfitt að vera yngst, ja fyrir utan náttúrulega Guðmund Stein sem er hvort sem er bara moli, en að mestu leyti hefur þetta gengið mjög vel hjá okkur og verið skemmtilegt.

fimmtudagur, mars 26, 2009

Um straff

Mamma veistu hvað straff er, spurði ég. Jú mamma kannaðist við það, þá mætti maður ekki gera eitthvað. Já, ég útskýrði betur fyrir henni að það væri þegar maður mætti ekki fara til vinkonu og sund og svoleiðis. Nema í skólasund, það má. En mamma það þarf ekki að hafa straff hjá okkur, bætti ég við, það er alveg nóg að hafa hlé!

Annars fann mamma miða sem ég hafði skrifað á umsagnir um alla í fjölskyldunni, það var svona:
Gabríel = loðni
Guðmundur = kjáni
Sigurður = góði
Rósa = snjalla
mamma = besta
pabbi = klári

Mamma var nú glöð að sjá að mér finnst hún ekki alltaf vera versta mamma sem hægt er að hugsa sér ;-)

fimmtudagur, mars 19, 2009

Fyrsta handboltamótið


Ég keppti á fyrsta handboltamótinu mínu um daginn og það var svo gaman! Við kepptum þrjá stutta leiki, fjórar saman í liði og skiptumst á að vera í marki. Ég skoraði mark, var ekkert smá ánægð með það :-) Og ég var ótrúlega dugleg að hlaupa til baka úr sókn til baka í vörnina, enda var ég orðin eldrauð í framan eftir síðasta leikinn og var bara í dágóða stund að jafna mig. En þetta var frábært og ég get ekki beðið eftir að fá að keppa aftur á móti. Ég ætla líka að vera í landsliðinu þegar ég verð stór, eins og þjálfarinn minn.

miðvikudagur, febrúar 25, 2009

GSM-síma búningurinn minn


Þennan síma föndraði ég með barnapíunni minni í gærkvöldi. Hann var pínu óþægilegur, ég gat t.d. ekki setið eða borðað í honum, svo ég tók hann bara með í skólann og fór í hann í smástund þar, en aðallega var ég í beinagrindarbúningnum hans Sigurðar Péturs, og í draugabúningi úr sængurveri þar yfir. Ég var mjög draugaleg og hræðileg!

sunnudagur, febrúar 15, 2009

Pælingar

Við mamma sátum og borðuðum grjónagraut í hádegismat (ég var veik heima). Allt í einu sagði ég upp úr þurru, mamma, ert þú ólétt? Mamma fór að skellihlæja, henni fannst svo fyndið hvernig ég sagði þetta. Þegar hún loksins gat komið upp orði sagði hún, nei ég er ekki ólétt, af hverju spyrðu? Nei bara, sagði ég, þú ert búin að borða svo mikið í dag!

Vetrarhátíðarfjör

Amma mín Inga Rósa var svo góð að taka mig með sér á Vetrarhátíð barna í gær. Þar var sko margt skemmtilegt um að vera, brúðuleikhús, risasápukúlur, sjóræningasmiðja þar sem ég bjó til augnlepp, tónlistarsmiðja þar sem ég bjó til hristu, salsadans (mamma rugluð, þetta er ekki rétt skrifað, við fórum á saNsaball) og svo fór ég í föndurgerð þar sem ég valdi vandlega lýsingar um mig og límdi á póstkort. Það sem ég valdi til að lýsa mér var: hjálpsöm, blá augu, jákvæð, skemmtileg, hávaxin, falleg, blíð, andlitsfríð og raunagóð. Ekki amaleg sjálfsmynd það :-)

fimmtudagur, janúar 22, 2009

Hrikalegt ástand

Mamma var áðan inni í eldhúsi að taka til matinn. Ég var búin að vera að kveina úr hungri og alltaf sagði mamma að maturinn væri alveg að vera til. Á endanum kom ég inn í eldhús, stóð fyrir framan mömmu og hreyfði munninn og benti upp í mig. Mamma skildi ekkert hvað ég var að reyna að segja, svo ég fór inn í herbergi og kom aftur með blað sem á stóð, "ég get ekki talað af hungri". Mamma fór að skellihlæja, ég held hún hafi engan veginn skilið alvöru málsins! En sem betur fer fékk ég loksins að borða.

miðvikudagur, desember 31, 2008

Síðustu tímarnir

Þá er þetta ár alveg að verða búið, búið að vera fínasta ár bara. Ég byrjaði í handbolta og í fyrsta bekk, fór til Frakklands í siglingu og um allt land í útilegu og meira að segja til Vestmannaeyja. Reyndar sigldi ég ótrúlega mikið á þessu ári, náttúrulega á bátnum í Frakklandi og með Herjólfi til Vestmannaeyja og til baka, svo fór ég í siglingu um Lagarfljót, í sjóstangveiði á Borgarfirði eystra og í hvalaskoðun frá höfninni í Reykjavík. Ég svaf líka ótrúlega oft í tjaldi og á mörgum stöðum, og á hverjum stað eignaðist ég nýja vinkonu. Í nokkra daga voru líka þær Júlía og Emilía og pabbi þeirra og mamma með okkur í útilegu, það fannst okkur nú eiginlega skemmtilegast. Amma og afi voru líka með okkur í nokkra daga, og Þórður og Erna meira að segja líka, það var nú best þegar allir voru með.

Ég hélt líka áfram að læra á sellóið mitt á þessu ári, ég er nú orðin bara ansi flink og búin að læra fullt af lögum, eins og til dæmis Bjart er yfir Betlehem og Fann ég á fjalli. Ég er líka orðin mjög flink að lesa og reikna, ég veit ýmislegt um heima og geima, er dugleg að spyrja og geymi vandlega svörin sem ég fæ.

Um jólin er ég búin að hafa það mjög gott með mömmu og pabba og bræðrum mínum. Fyrstu dagana í jólafríinu fékk ég að fara í vinnuna með mömmu, það er rosalega spennandi og það var mjög gaman þar, enda var slatti af krökkum þar með mömmum sínum og pöbbum. Svo erum við bara búin að vera í fríi og hafa það gott, ég fékk margar fínar gjafir sem ég var mjög ánægð með og búin að vera dugleg að hlusta á diskana, lesa bækurnar og púsla, ég fékk tösku sem ég tók með mér þegar ég fór að gista hjá frænku minni og náttfötin og inniskórnir komu sér vel í náttfatapartíinu sem ég fékk að halda fyrir allar bekkjarsystur mínar. Það var sko brjálað fjör, tuttugu stykki sex ára stelpur í jólafríi! Sem betur fer var ég búin að skrifa þétta leikjadagskrá, mamma og pabbi gáfu okkur pizzur og snakk að borða og svo vorum við bara á fullu í öllum leikjunum.

Og nú er að koma gamlárskvöld og ég ætla að vaka og sjá alla flugeldana. Við ætlum að vera hjá ömmu og afa ásamt fleira fólki, það verður örugglega fjör!

föstudagur, nóvember 28, 2008

Auglýsingaleikurinn

Um daginn þegar við vorum að horfa á Útsvar kenndi mamma mér auglýsingaleikinn. Mér fannst hann geggjað skemmtilegur, eiginlega skemmtilegri en Útsvar svo ég beið spennt eftir næstu auglýsingum. En nú er náttúrulega sá árstími þegar meirihlutinn af auglýsingum eru bókaauglýsingar, svo þetta verður stundum pínu einhæft. Nokkrum dögum seinna þegar ég var búin að fá mjög margar bækur í auglýsingaleiknum þá varð mér að orði, ég verð bara að fara að leggjast upp í rúm og lesa! Mér finnst líka svo gaman að lesa, ég er til dæmis farin að stelast til að lesa uppi í rúmi þegar ég á að vera farin að sofa, eins og mamma man líka eftir að hafa gert þegar hún var sex ára :-)

miðvikudagur, nóvember 05, 2008

Engar fréttir...

Dagarnir ganga sinn vanagang núna, það er alltaf gott að vera komin í rútínu og hafa nóg að gera. Nú þarf ég náttúrulega að mæta í skólann á ákveðnum tíma og með það fór ég snarlega að vera morgunsvæf. Samt bara virka daga, um helgar finnst mér alveg nóg að sofa til sjö. Í skólanum erum við að vinna alls konar með stafi og tölur í íslensku og stærðfræði, ég er til dæmis orðin ansi lunkin í gálga (hangman). Svo erum við reglulega í tölvum, heimilisfræði, vettvangsverðum, myndlist, leiklist og fleiru. Í frístundaskólanum eru líka afmörkuð námskeið, ég er búin að vera á námskeið í kínversku og leirlist, og er núna á jóganámskeiði. Svo er ég í handbolta tvisvar í viku eftir skóla, sellótímum einu sinni í viku og annan hvern laugardag eru hóptímar í selló. Svo það er nóg að gera hjá mér.

Jú svo er það nú að frétta að við fórum í Víðihlíð um helgina. Það var náttúrulega bara frábært eins og alltaf, ég var alveg til í að sleppa afmæli til að komast sem fyrst í sveitina. Við fundum smá snjó og lékum okkur á alveg frábærlega skemmtilegum snjóþotum sem pabbi fann í Toys'R'Us, þær eru eiginlega eins og lítið brimbretti, léttar og renna alveg ótrúlega vel. Veðrið var samt ekki mjög spennandi og við systkinin urðum öll þrjú ansi blaut og köld en það var samt rosalega gaman hjá okkur.

fimmtudagur, október 23, 2008

Nafnapælingar

Ef ég eignast til dæmis fjóra stráka og eina stelpu, þá eiga þeir allir að heita Snæfinnur en stelpan á að heita Snædís. Mamma spurði hvernig ég ætlaði þá að vita við hvern ég væri að tala, þá heitir einn bara Snæfinnur Björn og svoleiðis, skilurðu?

sunnudagur, október 12, 2008

Augljóst

Um daginn kom ég heim með heimaverkefni úr skólanum. Mamma spurði hvenær ég ætti að skila því. Ég hafði nú sjaldan heyrt eins kjánalega spurningu, auðvitað bara þegar ég væri búin með þetta!

laugardagur, október 11, 2008

Frúin í Hamborg

Mamma: Hvað keyptirðu fyrir peningana sem frúin í Hamborg gaf þér í gær?
Rósa: Ég keypti Ísland
Mamma: Ha? Allt Ísland?
Rósa: Allt Ísland
Mamma: Kostaði það ekki mikið?
Rósa: Ég veit það nú ekki. Ég er ekki búin að borga það.
Mamma Núnú?!?
Rósa: Ég átti ekki nógan pening.
Og þá gat mamma ekki annað en skellt upp úr...

Mamma var annars aðeins að útskýra fyrir mér að það væru ekki til eins miklir peningar á Íslandi lengur og sumir myndu kannski eiga svolítið erfitt af því mömmur þeirra og pabbar myndu missa vinnuna. Jújú, ég skildi það. Hafði samt ekki miklar áhyggjur, jú það er nú gott að eiga húsið sitt, en annars getur maður líka alveg bara byggt kofa og átt heima þar. Það myndi bara vera notalegt!

fimmtudagur, september 18, 2008

Afmælisstelpa

Loksins á ég afmæli í dag. Ég er náttúrulega búin að vera að bíða eftir þessu í marga daga og átt frekar erfitt með að sofna undanfarin kvöld. Ég spratt á fætur í morgun og fékk afmælissöng og pakka. Frá mömmu og pabba fékk ég myndavél (leikfanga, en samt stafræn, ótrúlega flott) sem getur meira að segja tekið smá vídeó. Svo mamma fékk að syngja afmælissönginn nokkrum sinnum inn á vídeó klukkan sjö í morgun, það var hressandi. Guðmundur Steinn söng líka fyrir mig, Khokha ammilidag :-) Svo fór ég með inn á leikskólann og hitti þar hana Hjördísi sem var hópstjórinn minn og knúsaði mig í bak og fyrir í tilefni dagsins, það var ósköp yndislegt. Og á eftir fæ ég svo að bjóða vinkonum mínum í Smáralindina í veislu, þá ætla ég sko að taka myndir af þeim öllum.

sunnudagur, september 07, 2008

Leikhúsið

Við skelltum okkur á opið hús í Þjóðleikhúsinu í gær, og það var svo aldeilis ljómandi skemmtilegt. Við sáum atriði úr Lífið er diskó og Skilaboðaskjóðunni, fengum að máta búninga, sáum alblóðuga menn úr Macbeth og líka Einar Áskel brúðuna, fengum kleinur og pylsur og andlitsmálningu. Þetta var bara alveg frábært og mjög vel heppnað fannst okkur, ef svo ólíklega skyldi vilja til að einhver úr Þjóðleikhúsinu sjái þetta þá bara þökkum við kærlega fyrir okkur :-)

laugardagur, ágúst 23, 2008

Tilgangur þróunarinnar

Engir tveir sebrahestar eru með eins rendur, eins og engar tvær manneskjur eru með eins fingaför. En sebrahestar nota ekki tölvur, þannig að rendurnar þeirra eru bara til skrauts.

(Skýring frá mömmu, vinnufartölvurnar þeirra pabba og mömmu eru báðar með fingrafaralesara til að logga sig inn, augljóslega eru fingaför því til þess að komast inn í tölvur).

miðvikudagur, ágúst 20, 2008

Sigling

Í gær varð pabbi minn fertugur. Í tilefni dagsins ákvað mamma að gera eitthvað skemmtilegt, svo hún brunaði með okkur alla fjölskylduna niður á höfn og um borð í hvalaskoðunarskip. Svo sigldum við af stað, og byrjuðum um leið að veltast svoleiðis til og frá að maður þurfti virkilega að halda sér fast. Mér fannst þetta eiginlega bara fjör, en var nú samt aðeins orðin skrítin í maganum á tímabili. Og stóri bróðir minn var barasta mjög sjóveikur greyið. En ég sá fullt af hvölum og var hæstánægð með ferðina. Ég hvíslaði samt að mömmu þegar við vorum komin í land og gengum til baka fram hjá hvalveiðiskipunum, að þetta hefði nú verið meira spennandi ef við hefðum líka verið að veiða hvalina.